Zaninah Copa Italia final

Italian football-in ngaihthah a hlawh a, Serie A-in ngaihven an hlawh tawk lo a, Copa Italia inelna khawvel hriatin a lar tawk lo.

Amaherawhchu Juventus-in Real Madrid hnehin UEFA Champions League final an lut a, treble champion thei dinhmuna an din chinah chuan Copa Italia-in ngaihven a hlawh hle. Zanin dar 12:15 hian Stadio Olimpico-ah Serie A champion Juventus leh Lazio ten Copa Italia final an khel dawn.

Kum 1995 khan Juventus-in final-ah Parma 3-0 a hnehin an champion a, khami hnu khan an la champion leh lo. Chutihrualin Juventus hi he inelnaah hian vawi kua champion tawhin AS Roma nen champion ngun ber an ni lawi si.

Juventus hmachhawn tur Lazio hi ṭum nga champion tawh an ni a, an champion hnuhnun ber kum 2013 khan Senad Lulic goal hmangin Roma 1-0 a hnehin an champion.

Stefano Pioli team-te hi Serie A table-ah pathumnaah an awm a, kartawp hian pahnihnaa awm mek Roma nen an inkhel dawn. Serie A-a pathumna hian Champions League playoff khelh a ngaih dawn avangin Rome derby hi a pawimawh ang.

Lazio hian an match hnuhnung parukah vawi hnih chiah an chak a, chutihrualin Inrinni khan Sampdoria 1-0 a an hneh avangin final khel turin an phur khawp ang.

Lazio manager Pioli chuan, "Coppa Italia final thlen hi kan phu a ni. Italy-a team ṭha ber leh Europe-a team ṭha ber zing ami Juventus kan tum dawn a, treble champion thei an nih avangin kan khingpuite hi hneh an harsa dawn a ni. Amaherawhchu kan khelhna tur Rome a ni a, min ṭantute hmaa inkhel tur kan nih avangin kan chak theih ngei ka ring," tiin a sawi.

Lazio hian final thleng turin Torino, Milan leh champion lai Napoli te an hneh a, Juventus-in Lazio hmachhawn tur hian Hellas Verona, Parma leh Fio­rentina an hneh ve bawk.

Juventus hian Real Madrid lama goal pawimawh khungtu Alvaro Morata chu hrem vangin an chhawr thei dawn lo. Morata chuan, "Ka khel thei lo hi pawi ka ti a, khelh reng ka duh avang­in ka khelh loh chuan ka hlim lo ṭhin. Amaherawhchu kan team hian chak kan duh a, kan manager-in chiang takin a sawi a, tupawh khel se champion kan duh a ni," tiin a sawi.