Arsenal mikhual tur Sunderland

Premier League-ah Chelsea champion chiang tawhin season thara Champions League khel tur pawh chiang tawh mah se pahnihna dinhmun luah tur a la chiang lo. Zanin dar 12:15 hian Emirates stadium-ah Arsenal in Sunderland an lo mikhual dawn a, an chak a nih chuan pahnihna Manchester City nena an inthlauhna an ti tlem sawt ang.

London club ṭha Arse­nal hian a zawnin season 11 chhung chu Premier League cham­pion nomawi an chawi tawh lo a, kuminah khel ṭha viau mah se hun pawimawhah an talbuai ṭhin avangin an elpui Chelsea chu point 13-in an phak lo mek.

EPL champion no­mawi chawi lo rei tawh viau mah se Arsenal hi an che chhe tak tak ngai lo a, a zawnin kum 19 chhung chu a sang pali zingah an tel thei. An match hnuhnung berah Manchester United nen goal khat ve ve khunga an inhnehtawk avangin EPL-ah pathumna aia hniam an ni tawh lo chiang a, mahse pahnihna an nih theih na a tlem tawh hle. Pahnihna ni tur chuan an game khelh hmabak pahniha an chak ve ve a ngaih bakah City-in an game hnuhnung berah Swansea City an hneh loh a ngai tawh.

Tun thla tir khan Sunderland hi table-a a hnuai pathum zingah awmin division hniam lama tla thei dinhmunah an ding. Tunhnaiah in­siam ṭhain Stoke City nen an inhnehtawk hnuah Southampton leh Everton an hneh a, an dinhmun erawh a la him chuang lo. Tla thei dinhmuna ding an nih vangin Sunderland hian zanin hian point hmuh ngei an tum dawn a, anmahni khelmuala tlawm hreh tak Arsenal nen an inhmachhawn tur hi a hmuhnawm hle ang.