Haaland-a'n a pet goal leh tawh

Norway manager Lars Lagerback-a'n Erling Braut Haaland chu Lionel Messi leh Cristiano Ronaldo te tlukpui a nih theih thu a sawi a, Borussia Dortmund forward hian 

Thawhṭanni zana Northern Ireland 5-1 a an hneh ṭumin goal hnih a khung.

Windsor Park, Belfast-ah Norway tan Mohamed Elyounoussi-a'n minute hnihna lekah goal hmahruai a khung a, Manchester United player hlui Paddy McNair hmangin Northern Ireland-in minute ruknaah an sut. 

Norway tan mi bik Erling Haaland a rawn inlar nghal a, box pawn aṭangin a ke vei lamin goal mawi zet a khung. Haaland-a kawppui Alexander Sorloth pawh goal-ah a hmui a, minute 19-naah Norway goal thumna a khung.

Second half-ah Haaland a che ṭha zui a, minute 47-naah a ball pass ṭha zet chu Sorloth-a'n a pet goal. Dortmund striker Haaland hian keeper chiah a hmachhawn hnuah awlsam zetin Norway goal ngana a khung.

Erling Haaland hian Zirtawpni zana Austria an hneh loh ṭumin Norway tana a goal hmasa ber a khung a, tuna a goal hnih nen ram tana match li lek a khelhah goal thum a khung tawh.

Norwegian striker hian kum 2019-a neih U19 World Cup-ah Honduras 12-0 a an sawp ṭumin goal kua a khung a, khawvelin a hmehriat ṭan. Haaland-a pa hi Manchester City player hlui Alf-Inge Haaland a nih avangin football khawvelah a mikhual lo.

Kumin January thla khan Borussia Dortmund a pan a, match 18 a khelh aṭangin goal 16 a khung hman. Lars Lagerback chuan, "Player danglam bik a ni a, world class player ni thei tur a ni. Goal bul hnaiah hi chuan top class a ni tawh a, a inhliam lo a nih phawt chuan thui tak a kal thei ang," tiin a sawi.