French Open khel lo tur Barty

Hmeichhe tennis world number 1 leh champion lai ni bawk Ashleigh Barty chu French Open-ah a inlan dawn lo. Paris khawpuia Australian star inlan loh tur chhan hi Covid-19 vang a ni, player ṭhenkhat pawh an inhnukdawkin a rinawm.

French Open hi a tirah chuan May thlaa khelh tura tih kha a ni, mahse coronavirus vangin a hun pangngaiah khelh theih a ni lo - September thla chawhnu lam hian khelh a ni dawn a, nikhatah entu 11,500 an awm thei ang.

Hripui leng hi Europe ram ṭhenkhatah chuan an thunun thei deuh tawh a, a bik takin France-ah pawh mipui punkhawmna lam thil chu inkaihhruaina 

ṭha tak hnuaiah neih theih a ni tawh bawk.

Mahse, world number 1 Barty chuan, "Khawvel leh tennis tan chuan kum duhawm lo tak a ni, inkhelh chakin nghakhlel viau mah ila ka hriselna leh himna ngaihtuah a ngai si a, Paris-ah inkhel turin ka kal lo ang. Min ṭantute hmaa inkhelh leh theih hun tur chu dawhthei takin ka nghak ang," a ti.

US Open aṭang pawhin Barty hi a inhnukdawk, New York khawpuiah chuan hmeichhe singles player ranking sang zual 10 zinga paruk an inlan lo. French Open-ah pawh hian player eng emaw zat chu an inhnukdawk ngeiin a rinawm.