India tana match 150 khel thei Remsiami : Mellung a phun niah goal hnih a khung

Lalremsiami Hmar - a hming hi Mizoram chauh ni loin India infiamna huangah chuan a langsar tawh a, tu nge a nih inzawh nawn a ngai lo. Mizo nula hian India hmeichhe hockey team tan match 150 a khel tling ta!

Ningani zan khan India hian Women’s Asian Champions Trophy 2024-ah Thailand an hmachhawn, he inkhel hi Remsiami tan mellung hlu bik a phunna hun a ni a, goal hnih khungin India hi 13-0 teh meuhin a chakpui.

India hian an match hmasa lamah South Korea (3-2) leh Malaysia (4-0) te an lo hneh tawh bawk a, match vawi thum an khelh tawhah an la chak fai vek - vawiin tlai dar 4:45 hian China nen an inhmachhawn chhunzawm leh dawn a ni.

Ram paruk inel zingah India leh China te hi mahni khingpui la hneh ve ve an ni a, an pahnih inkhel tur hi a pawimawh. Vawi khat ṭheuh an inkhelh kual hnuah a sang paliten semifinal an lut dawn a, goal khung tam thei nih a pawimawh bawk.

Match 150

Kolasib naupang a ni ṭhin a, kum naupangte ni chungin Thenzawlah hockey khelh a zir ṭhin. A zinkawng tir lam chu a awlsam bik lo, mahse hockey khel tur bika duan a ni a, a tumruhna leh tihtakzetna chuan tun dinhmun hi a hruai thleng ta.

Lalremsiami Hmar hi kum 24 mi chauh a la ni a, mahse India senior team tan match 150 a khel der tawh. Junior team training an neih laia senior huanga koh kha a ni a, an team zingah a naupang ber a ni chho ngar ngar ṭhin.

Forward a ni a, mahse mamawh dan a zirin ball semtu atan an hmang tam. India tana goal 40 khung tawh Remsiami chuan, "Keima theihna chuan tun hun hi ka thleng dawn lo. India tana match 150 khelh chu Pathian min hruaina vang chauh a ni chiang hle.

"Mizo mipuiten engtik lai pawhin min thlawp ṭha reng a, ka chhungten tawp chin nei loin min thlawp bawk. Kei leh hockey chungchanga ka hun tawnte hi chu Pathian min hruaina vek a ni," tiin Vanglaini a hrilh a, a thlen chinah a lawm.

Tokyo Olympic-ah khan Remsiami hi India aiawhin a lo khel tawh, kumin nipui laia neih zawh tak Paris Olympic pawh kha an khel phak teuh hle a, match khat an chak loh vang chauha infiamna khawmpui lian thleng zo ta lo kha an ni.

Mizo nula Remsiami chuan, "Pathianin rem a ti a nih chuan India tan a tam thei ang ber khelh ka tum a, ka tum leh beisei anga kan awm thei a nih phei chuan Olympic khelh leh ngei pawh ka tum," tiin a sawi, a kum a la tlem bawk a, hun remchang a la neih theih a rinawm.

Remsiami hian India tan hian 2022 Commonwealth Games, Asian Games 2018 leh 2022-ah te khan medal a la tawh a, hockey huang bik inelnaah chuan Asia leh khawvel huap pawhin medal a lo vaw chhuak tawh bawk.

Lawmpuina

Lalremsiami Hmar hian lawmpuina thu tam tak a dawng. Sports minister Lalnghinglova Hmar chuan, "India tana vawi 150 inlan thei Nl Lalremsiami kan chhuangin kan lawmpui a, a kal zelna turah duhsakna ka hlan e.

"Women’s Asian Champions Trophy 2024 khelh mekah India chuan 13-0 in Thailand an hneh a. He inkhel hi Lalremsiami tan international match 150 na niin, goal hnih a khung nghe nghe a ni," tiin social media kaltlangin lawmpuina thu a sawi.

Mizoram chhunga hockey thuneitu sang - Hockey Mizoram pawhin thuchhuah siamin, "India tana vawi 150 khel thei leh goal 40 lai mai vaw chhuak thei a, mellung pawimawh tak i phun hi kan lawmpuiin kan chhuang tak meuh meuh a che," an ti a, a kal zelna tur atan duhsakna an hlan bawk.

Remsiami bakah hian Mizo nula ṭhenkhat chu Thenzawl Hockey Training Center aṭanga inzir chhuak, chumi hnua India tana inlan phak an awm nual tawh. Hockey coach Lalroṭhuami (Bte-i) chuan, "Kolasib naupang, cher ve deuh, ria ve tak khan hockey a rawn zir ve a.

"Amah hriate khan hockey avangin Mizoram hi India ramah a chawimawi ang a, India tan fanu rangkachak a ni ang tih tu nge ring ang. India hmeichhe hockey-a mi ṭangkai, India tan vawi tam tak lo chakpui tawhtu, vawi tam tak goal lo vaw lut tawhtu Siami hian tun ang dinhmun a thleng ta.

"India tan vawi 150 lai a khel tling ta hi ka lawmpuiin ka chhuang takzet a, damna, hriselna leh finna pe ṭhintu Pathian hnenah pawh lawmthu awm mawlh mawlh se la, a kal leh zelna turah ka duhsakna sang ber ka hlan.

"India hmeichhe hockey team-a mi pawimawh ber a nih chho hi ka ringin ka beisei a, chutihrualin a naute Mizo hmeichhe hockey khelte tana sulsutu pawimawh a nih chho zel pawh ka duh bawk a ni," tiin Vanglaini hnenah Remsiami chungchang a sawi.