Mizoram an chak lo nghal!
Santosh Trophy-a an match hmasa berah Mizoram an chak lo nghal - nimin khan Mizoram hian inelna thlengtu Tripura an hmachhawn a, khualmualah Mizo tlangvalte an inthlahrung ta em ni chu aw, tih turin an tlawm.
Mizoram tan Santosh Trophy la champion ngai lo Tripura hi 'hneh sa' ang deuh thaw hiala sawi theih a ni a, mahse, Agartala khawpuia an intawn meuh chuan 4-1 in Tripura an chak.
Pathianni zing dar 9:00-ah Mizoram hian Manipur an hmachhawn leh dawn a, final round inpetkai turin B. Malsawmzuala leh a hoten Manipur an hneh ngei ngei a ṭul dawn - an tlawm a nih chuan final round khel phak loin Santosh Trophy an mangṭha ang.
A har
Inkhelh hmain Mizoram coach B. Malsawmzuala'n tlai ni nema inkhel tur an nih avangin an tan harsatna a awm loh tur thu a sawi a, khelmual hi Mizoram player-te khelh ṭhanna ṭhin artificial turf a ni bawk.
Mahse, Agartala khawpuiah anmahni ṭawiawmtu Mizo mipuite lawmna Mizoramin an thlen thei lo a, minute 28-naah goal an chhuah nghal - Kolkata club lar United SC forward Parvaj Bhuiya chuan goal hmahruai a khung a, Mizo player-te an hawihai.
Mizoram an insiamṭha mai dawn emaw tih laiin an insiamṭha lo a, tlarhmaah an hriam tawk lo a, an goal nawr a na tawk lo. Chawlhlawk hman nan minute thum chiah a awm tawh tihah hrem an ni zui a, Zabet Darlong chuan Tripura goal hnihna a khung a, 2-0 a ni.
Danglam tum
Mizoram coach Sawmtea'n inkhel result thlak danglam a tum a, tlarhma lamah Moses Lalrinzuala la chhuakin HK Lalhruaitluanga a luhtir a, Lalngaihsaka aiah MPL-a player hmuhnawm pawl Michael Lalbiaksanga a luhtir bawk.
Mahse, beisei angin thil a danglam mai lo. Mizoramin Tripura tlarhnung ṭhiah an harsat a, 2-0 in rei tak an hnufual. Minute 85-naah beiseina thi lek lek tawh chu chhi nung turin F. Lallawmkima'n si phurh a rawn sut ṭhen a, 2-1 a ni.
Umakanta Mini Stadium-ah Mizoram ṭantute hlim authawm pawh a reh fel hman lo! Minute khat hnu lawkah Tripura tan Zabet Darlong chuan Tripura goal thumna a khung a, hun pek belhah Sukanta Jamatia chuan chak nemnghehna a khung zui.
A harsa dawn
Santosh Trophy-ah group pakhatah team pali zel an awm a, group tin aṭangin hmahruaitu bakin final round an khel dawn lo - Mizoram group-ah hian an hneh loh tak Tripura bakah Manipur leh Sikkim an awm tel.
Manipur hian nimin inkhelah 6-1 ngawtin Sikkim an sawp a, an hmabak a êng nghal hle. Pathianniah Mizoram an hneh a nih chuan final round lut turin an dinhmun a ṭha sawt dawn a, Mizoram result hian a tiphur khawp ang!
Mizoram tan tlawm a thiang tawh lo tihna a ni a, final round lut turin Manipur hneh ngei ngei a ngai. Mizoram hian nikum khan final round group stage-ah Manipur hi 4-1 in an ngam lo a, Mizo football fan-te hliam a la dam lo - thih leh dam kara leng Mizoram tan chak a ngai e.