Nuamsain England an chak

October international break-ah England-in rin loh takin Greece chu 2-1 in Wembley Stadium-ah an ngam lo a, an mualpho. Mahse, Ningani zan khan thawnthu an thlak danglam lehnghal a, Athens khawpuiah 3-0 in Greece hi an hneh.

England tan captain Harry Kane aia luhtir Ollie Watkins chuan goal hmahruai a khung a, minute 77-naah Greece keeper Odysseas Vlachodimos chuan Jude Bellingham-a 'shot' chu an lamah a tilut a, Curtis Jones-a'n chak nemnghehna a khung bawk.

Three Lions tana goal thumna khungtu Curtis Jones-a'n ram tana a match hmasa ber khelhnaah bul a ṭan nghal a, goal a khung nghal bawk - tun season-a Liverpool chet ṭhat nana player pawimawh hi England jersey nen pawh a khelh ṭhat chhunzawm a, Athens khawpuia thil thleng hi a tan chuan zan chhinchhiah tlak a ni.

England tan Jones bakah Newcastle United left back Lewis Hall leh Aston Villa player Morgan Rogers te chuan ram tana an match hmasa ber an khel ve bawk a, anni erawhin England jersey an hak hmasak berah bul an ṭan ve lo.

Hall hian Aston Villa defender Ezri Konsa a thlak a, Morgan Rogers hian Newcastle United forward Anthony Gordon a thlak thung - England hi manager lailawk Lee Carsley-a kaihhruaina hnuaia an hun hnuhnungah player pakua ngawtin an inhnuhdawh san a, captain Kane phei chu a lungawi lo hle.

Mahse, pressure nei miah loa team kaihruaitu Carsley-a'n hei hi remchangah lain, ram tana la inlan ngai lo player leh tawnhriat nei tlem zawk chhawr nan a hmang a, tun season-a beisei phak lo Bellingham a khel ṭha em em bawk - England tan zan duhawm a ni.

League B lama inlan Three Lions hian Pathianni zan dar 10:30-ah Republic of Ireland chu Wembley-ah an mikhual ang a, hnehna an chan chuan season tharah chuan League A lamah an kir ve leh tawh ang - January aṭanga Three Lions enkawl tur Thomas Tuchel tan thu hriat nuam a ni ang.