Champion lai lakah Celtics an nep lo

Boston Celtics chuan nimin zing khan NBA champion lai Toronto Raptors chu 111-89 in an hneh a, rinkai lo zawk Celtics hian Eastern Conference semifinal series-ah 3-2 in hma an hruai - Ningani zing dar 4:00-ah game 6 an khelh chhunzawm ang.

HP Field House-a inkhelah Celtics lamin bul an ṭan fuh, quarter hmasa berah 25-11 in hma an hruai fal nghal, quarter hmasa pahnihah an san fal avangin a hnuhnung lamah hniam zawk mah se a dingchang zawkah an ṭang.

Celtics tana point 27 neitu Jaylen Brown chuan, "Hna kan la zo lo, match khelh leh turah hian a ṭha thei ang bera kan khelh leh a ngai ang," a ti. Game khat an lakbelh leh a nih chuan conference final an lut tawh dawn a ni.

Raptors point-guard Kyle Lowry chuan, "Keini aiin thahrui an nei zawk a, theihtawp an chhuah miau avangin a awlsam lo," tiin a sawi. Raptors player zingah point 20 nei tling an awm lo, team pum an khelh ṭhat loh zan pawha chhanchhuak theitu player an mamawh.

Nimin zing inkhel dangah Los Angeles Clippers chuan Denver Nuggets lakah 113-107 in hnehna an chang, series-ah Clippers hian 2-1 in hma an la hruai. Ningani zing dar 6:30-ah game 4 an khel ve leh thung ang.