Messi hoin Argentina chak lo

Lionel Messi leh Argentina tan chak reng theih a ni bik lo - nimin zing khan an mikhualna ramah Argentina hi Paraguay lakah 2-1 in an tlawm.

South America World Cup qualifier khelh laiah, world champion Argentina tan Lautaro Martinez chuan minute 11-naah goal hmahruai a khung a, mahse mualneitu lamin Eduardo Sanabria hmanga an sut bakah defender Alderete Fernandez chuan chakna goal a khung.

Ram pahnih inkhel tur hian a hmain boruak an nei - Paraguay hian anmahni ṭantute zingah Messi-a hming chuanna jersey hak an phal loh thu an sawi a, stadium chhungah luh phal a ni lo.

Argentina hian khingpui hrang hrang an nei ṭhin a, an khingpui team ṭantu zingah ngei pawh Messi ngainatu an tam ṭhin, chung mite chuan Messi-a jersey an ha fo, tun ṭum inkhelah kha chuan an phal lo a ni.

Chak lo mah se Lionel Scaloni naute hian hma an la hruai tho, match 11 aṭanga point 22 hmuin a chung berah an la awm - November 20, Nilaini zingah Peru an mikhual ve thung ang.

Nimin zing inkhel dangah Brazil pawh an chak zo lo. World champion vawi nga ni tawh tan Barcelona forward Raphinha-a goal khung chu Venezuela lamin Telasco Segovia hmangin an sut a, 1-1 in an inhnehtawk.

South America ram 10 hi vawi hnih ṭheuh an inkhel chhuak dawn, a sang parukte chu World Cup 2026 khel turin an tling nghal ang. Pasarihna chuan playoff an khel dawn a ni.