MotoGP hmawr an bawk dawn ta

Bike intlansiakna sang ber MotoGP chu tun kartawp hian a hmawr bawk a ni dawn - Valencia MotoGP tlan thei lo mah se Barcelona MotoGP an tlan thung dawn a ni.

Circuit de Catalunya-ah Inrinni hian Sprint Race an tlan dawn, rider championship hmahruaitu Jorge Martin a chak a nih chuan intlansiak pangngai Pathiannia an neih hmain champion tur a chiang thei tawh ang.

Spanish rider Martin hian amah hnaih bertu Francesco Bagnaia aiin point 24-in hma a hruai fel mek. Martin chuan, "Season hmasa kha chuan engtiangin nge ka champion theih ang tih leh mellung phun dan tur khan ka rilru a tibuai.

"Chuvangin ka nih tur ang ka nih phak loh phah ni pawhin ka hria, tun season erawh boruak a danglam. Intlansiakah engtiangin nge ṭha taka ka tlan theih ang tih chauh ka ngaihtuah tawh, chumi hnuah result ṭha chu a lo kal mai," a ti.

Pathiannia intlansiak hi Martin tan Pramac Ducati tana a tlan hnuhnung a ni dawn, champion a duh ngei ang - season thar aṭang chuan Aprilia a zawm dawn, inremna an ziak fel vek tawh a ni.

Francesco Bagnaia tan beisei tur a tam tawh lo a, mahse a tawp thlenga beih erawh a tum. Italian rider chuan, "Thil tum chiang tak ka nei, Inrinni leh Pathiannia hnehna chan a ni, chu chu ka tih theih sang a ni ang.

"Kan hmaah eng nge lo thleng dawn kan hre lo, inelna kan hmachhawn a nih chuan a tawp thlengin kan bei ngam tur a ni ang. Hnehna ka chan ringawt pawh a tawk lo a, vanneihna ka mamawh tel bawk.

"Hnehna chang pawh ni ila Jorge hi parukna pawh ni se a champion phak tho, chuvangin ka tan chuan thil mak a thlen tel pawh a ngai," a ti a, a tawp thlenga theihtawp a chhuah tur thu a sawi bawk.