Semifinal-ah Sinner leh Fritz an lut

Jannik Sinner chuan ATP Finals 2024 khelh laiah semifinal a lut - Italian tlangval hian group match pathum a khelhah hnehna a chang fai vek a, midang result ngaihchan tel ngai miah loin a tlang.

Ningani zan inkhelah Sinner hian Daniil Medvedev chu 6-3, 6-4 in a hneh. Ilie Nastase Group inkhel dangah Taylor Fritz chuan Alex de Minaur chu 5-7 6-4 6-3 a hnehin, a thiam zual pali zingah a inhlangkai ve bawk.

Group match vawi hnih ṭheuh an khelh khan an dinhmun a la chiang lo a, tlang tur pahnih tichiang turin match thumna hi a pawimawh - Medvedev tan semifinal lut turin Sinner hneh ngei ngei a ngai.

Russian tlangval Medvedev hian a tir aṭangin thapui a thawh, mahse tunlai player ṭha bik Sinner a chesual duh miau si lo a, a tan semifinal lut turin kawng hawnsak a ni lo.

Seeded pakhatna Sinner chuan, "Kum tluan maiin ṭha takin ka khel thei a, tun hi ṭha taka a hmawr bawk hun chu a ni. A tawp khar ṭha turin theihtawp takmeuh ka chhuah.

"Semifinal-ah tunge ka hmachhawn dawn tih chu a pawimawh ber a ni lo, ka game pangngai angin ka khel chhuak thei em tih chu a pawimawh lai a ni zawk," a ti a, inrintawkna a nei sang hle.

Inkhel dangah chak ngei ngei mahmawh De Minaur a chak lo. Australian tlangval hian amah ang bawka chak duhtu Fritz a ngam lo a, a tan a thiam pali zinga inhlankai theih ve a ni ta lo.

American tlangval Fritz chuan, "Kan point kha en let ila, kan inhlat lo dun hle. A tawpah chuan a vannei zawk ka tlang," tiin De Minaur lakah awlsam taka a chak bik loh thu a sawi.

Nizan khan group lehlamin semifinal lut tur an chingfel. Carlos Alcaraz, Alexander Zverev, Casper Ruud leh Andrey Rublev ten semifinal beiseina an la nei vek a, result erawh kan hre hman lo.