Italy leh France ten quarterfinal an lut

UEFA Nations League khelh mekah Italy leh France ten quarterfinal an lut ta a, Ningani zan inkhelah team pahnih hian point an hlawh chhuak ve ve - Italy hian 1-0 in Belgium an hneh a, France-in 0-0 in Israel an inhnehtawkpui thung.

Belgium-in Italy an ngam loh avangin quarterfinal an lut thei lo chiang tawh a, a sang berah pathumna bak an ni thei lo. Chumi awmzia chu relegation playoff tal an khelh a ngai dawn tihna a ni a, season thara Nations League-a League B khel thei dinhmunah an ding.

Italy hian Pathianni zan dar 1:15-ah France an mikhual zui dawn a, Les Bleus hi an inhnehtawkpui a nih chuan group hmahruaitu an ni chiang dawn a, France tan chak ngei ngei a ngai thung - mikhualna ramah thil awlsam a ni dawn lo.

Belgium-in Pathianni zan dar 1:15-ah vek Israel an lenchilh dawn a, Israel ram buai avangin Bozsik Arena, Hungary-ah an inkhel dawn - Belgium tan relegation pumpelh a, playoff khel turin draw result a tawk a, Israel tan si thum fai tala chak a ngai thung.

Belgium ngamtu Italy

Brussels khawpuiah Italy-in mikhual tlangnel zia an chhuah a, minute 11-na lekah goal an khung nghal - goal khungtu hi Newcastle mdifielder Sandro Tonali a ni a, ram tana a goal khung hmasak ber a nih avangin a hlu bik ang.

Season hmasa lawka sum inthapna lama a lo inhman avanga thla riat zet khel thei lo tura an hrem Tonali hi August thla khan an hremnate tuar zoin, khelmualah a inlan leh ṭan a, ram tana a goal hmasa ber hial a khung ta.

Ningani zan inkhelah Belgium-in si phurh sutna remchang nei mah se, an hun ṭha neih an chhawr ṭangkai thei lo a, a bik takin Leandro Trossard-a cross aṭanga ball kal Wout Faes-a'n post a tauh perte chu a ui vawng vawng ang.

Belgium coach Domenico Tedesco tan result ṭha a ni lo - kum 39 mi coach hi a keeper Thibaut Courtois chuan an ram coach a nih chhung chu Belgium tana inlan a tum tawh loh thu a sawi bawk si a, khelmualah result ṭha a nei chuang bawk si lo a, Belgium hian an ring chhunzawm zel ang em, tih chu zawhna awm a ni.

Goal khung lo

France-in Real Madrid-a beisei phak lo, hahdam mamawh, an captain Kylian Mbappe chu squad-ah an ko lo a, a tel loin goal an khung thei lo - an mikhual Israel chu 0-0 in an inhnehtawkpui a, group hmahruaitu ni turin match tawp bera Italy an hneh a ṭul dawn phah.

Stade de France-a inkhelah France hian vawi 24 ngawt 'shot' an nei a, mahse, goal-ah an khung chuang lo - Israel keeper Daniel Peretz chuan vawi riat ngawt save a nei a, Mbappe awm loh ringawt hi France tan chhuanlam a tling lo.

Real striker hi awm lo mah se, Paris Saint-Germain player pahnih Randal Kolo Muani leh Bradley Barcola, Bayern Munich forward Michael Olise te ho an awm a, bench aṭanga lut turin Marcus Thuram, Christopher Nkunku leh Kingsley Coman te an la lut thei bawk.

Mahse, France vanneih zan a ni lo a, a pawimawh ber goal an khung miau loh avangin Israel lakah an chak zo lo - Pathianni zanah Italy hneh ngei tumin an feh chhuak ang.

Entu an tlem

Mipui 80,000 lenna Stade de France-ah inkhel entu an tlem takzet a, hei hi a chhan ber chu Israel-Gaza indona avanga fans tam tak an hlauhthawn vang a ni - kar hmasa lawk khan heng thil vang hian Amsterdam khawpuiah football fans inkarah buaina a chhuak.

Europa League match-ah Ajax chuan Israel club Maccabi Tel Aviv an mikhual a, he inkhelah hian Palestine ṭantu ṭhenkhat leh Israel fan-te an intibuai a, Israel sorkar chuan an khua leh tuite chu an ram pawna hetiang intihhlimna thila kal lo turin an ngen hial.

Mahse, Israel fans 100 vel chu France nena an inkhel en tur hian a hmunah an kal lui a, France ṭantuten an hnam hla an au el hluah hluah karah, "In mi hrente chhuah rawh u," tih banner an keng - Gaza hmuna Hamas helten Israel mi an hrente chhuah tura an tihna a ni.

Hetiang boruak karah hian buaina tenau pawh a chhuak a, mahse, harsatna liantham thleng erawh a awm lo - stadium veng ringawtin police 2,500 vel an duty a, stadium staff 1,600 awmin, police 1,500-in khawpui leh mipui veivak an thlithlai reng bawk.