Roma manager thar Ranieri

Claudio Ranieri chuan football team a enkawl leh dawn ta, chawlh a puan aṭanga thla ruk hnuah a lo kir leh tihna a ni - tun season tawp thleng atan AS Roma a enkawl ang.

Italian manager hian Roma a enkawl dawn a ni satliah lo, season thara amah thlaktu tur ruat chungchangah pawh club thuneitute a pui dawn a, team enkawl hna a thawh zawh hian senior executive nihna a chelh chhunzawm dawn bawk a ni.

Kum 73 mi Ranieri hian tun hmain a seilenana khua a awm Roma hi vawi hnih a lo enkawl tawh. Kumin May thla khan Cagliari enkawl hna a chawlhsan a, hahchawlh duh ve tawh mah se Roma-in an mamawhna chu a hnar thei lo.

Roma hian Jose Mourinho an ban hnuah Daniele de Rossi an ruai a, an club legend ho hian beisei nei sang hman viau mah se rei an daih lo. Rossi thlaktu Ivan Juric pawhin an duh leh tum ram a thlen pui thei lo a, tun hnai khan an ban leh ta a ni.

Ranieri hian team enkawl kawngah tawnhriat a nei tam tawh hle, kum 37 chhung teh meuh chu coaching hna thawk tawhin, hetih chhung hian team 18 a kaihruai hman, club hrang hrang bakah Greece national team a enkawl tawh bawk.

Kum 2015-16 season khan khawvel mak tih turin Leicester City chu Premier League nomawi a chawipui a, a chanchin an sawi apianga an sawi tel tawh tur a ni ang - Foxes tan chuan Ranieri hlutna hi a sang vet vet hle a ni.

Ranieri tan hna a awlsam dawn lo - Serie A season kal laiah Roma hian match 12 aṭangin point 13 chauh an hmu a, table-ah 12-na an ni mek. Rome club tan champion beisei ngam a ni dawn tawh lo, chutihrualin season thara European football khel phak chin tal nih an tum ang.