Premier League-ah 'El Matador' a inlar

Pathianni zan inkhelah Manchester United-in halftime-ah Southampton lakah goal hnih an phur a, goalkeeper David de Gea a inhliam. Ole Gunnar Solskjaer hoten chhantu an mamawh - an mamah chhanna chu Uruguayan striker Edinson Cavani a ni. 'El Matador' hminglem an pek Cavani hian goal hnih a thun a, goal khat dang a siamsak bawk a, Man United 3-2 in a chakpui.

St. Mary's Stadium-ah Jan Bednarek leh James Ward-Prowse te hmangin Saints-in hma an hruai a, Solskjaer hote hawi buai hman mah se Cavani-a'n danglamna a thlen - Bruno Fernandes goal khung tur a siamsak hnuah goal hnih dang a tauh lut a, chakna goal hi hun pek belha a khung a ni.

Manchester United forward Anthony Martial chu inkhelh hma zanah a khua a sik avangin squad-ah pawh a tel thei lo a, Scott McTominay leh Paul Pogba-te inhliam vangin an tel lo bawk.

Solskjaer-a'n Donny Van de Beek leh Mason Greenwood-te bul ṭantu zingah a telh a, Cavani erawh bench-ah a awm thung.  United-in bul an ṭan ṭha a, Greenwood-a'n keeper a bum hnuah goal-ah a chantir thei lo.

United chhuanvawr Bruno Fernandes-a'n goal khungna hun ṭha nei mah se a uluk tawk loh avangin keeper Alex McCarthy-a'n a dang leh hman. Solskjaer hote awlsam taka chak mai turah a ngaih theih.

Southampton an insiamṭha thut a, James Ward-Prowse-a corner ṭha zet chu Jan Bednarek-a'n minute 23-naah a tauh lut. Saints captain Ward-Prowse-a'n a ball pet thiamna hmangin United tlarhnung a chhaih buai hle.

English midfielder Ward-Prowse hian minute 33-naah freekick aṭangin a khung leh a, goal dang khung belh tur ang hialin an khel ṭha. Amaherawhchu Stuart Armstrong-a'n chance ṭha a hlah a, keeper talbuai David de Gea-a'n goal dang a chhuah belh lo.

Second half ṭan phatah patuai deuh Greenwood aiah Cavani a rawn lut a, kum 33 mi hian beisei tur nei tawh lo United tan beiseina a rawn siam. Marcus Rashford-a'n ball a pek mai loh avangin Cavani hian goal khung mai lo. Amah Cavani erawhin minute 60-naah Fernandes goal khung tur a siamsak a, Portuguese midfielder hian ball a dawn ṭhat avangin awlsam takin a khung phah. 

Minute 74-naah Bruno-a'n 'El Matador' a siam lêt a, Uruguayan striker hriamzia a lang. Bruno hian goal-ah petin Saints player dan per chu Cavani hian a tauh hman a, replay thlir nawn lehin thil awm dan a hriat fiah chauh. United player dang an din mawl tawp laiin vawi tam goal khung tawh striker hi ball kal theihna tur thleng hman turin a insiamrem hman!

Point hmuh inbeisei tawh lo Man United tan point khat a lawmawm tawk. Cavani erawhin a la duhtawk mai lo - injury time-ah Rashford-a cross chu Cavani-a'n a tauh goal. "Striker ṭha hi an chher chawp theih loh a, a piana piang an ni," tia an sawi ṭhin thlen diktirtu a ni - pianpui finna leh thiamna a nei.

United hi chak lo se a hnuai lam paruk zinga awm thei kha, an chak tak avangin pariatnaah an invawrh. Match khata khel tlemin hmahruaitu Tottenham Hotspur chu point nga chauhin an pha lo.

Solskjaer chuan, "Tun ṭuma kan chakna angah hi chuan tihsual tam tak awm mah se kan lawmna ang ṭhin kha a ni. Kan khelh ṭhat em avangin 2-2 ah pawh ka lawm. Hma kan sawn zel a ni," tiin point khat lekah pawh a lawm tur thu a sawi.

Solskjaer chuan, "A tlan thiam a, a hun takah a che bawk. Goal duhin a tuihal a, hei tak hi centre-forward in an mamawh chu a ni," tiin chakna goal khungtu a fak. United-in Nilaini zan Champions League-ah PSG an hmachhawn dawn a, Cavani-a'n amah duh lotu French club a hmachhawn thei dawn.