Serena dal thei an awm lo

US Open khelh laiah Serena Williams chuan nomawi duhin a tuihal a ni tih a lantir chhunzawm. Thawhṭanni zan khan a khingpui Maria Sakkari chu 6-3, 6-7 (6-8), 6-3 a hnehin quarterfinal a inhlangkai.

Tun thlatir khan Western & Southern Open last 16-ah player pahnih hi an intawng tawh - Greek nula zawkin hnehna a chang. Grand Slam huangah erawh American star a chesual nawn duh lo, darkar hnih deuh thaw an inkhelh hnuah a chungnung zawk.

Kum 38 mi Serena chuan, "Point khat chauh hmuh belh tur pawhin beih nasat a ngai thei hle, player huaisen leh beidawng ve ngai lo hmachhawn chu a hautak a ni. A khelh ṭhat em avang khan ka tan chetsual zeuh pawh a thiang lo tih ka hria, a tawpah chuan ka duh ang a hlawhtling," a ti.

Grand Slam nomawi 24-na beiseitu hian a match lehpekah chuan Tsvetana Pironkova a hmachhawn ang. A vawi khat nana US Open quarterfinal lut turin Pironkova hian world number 56 Alize Cornet chu 6-4, 6-7 (5-7), 6-3 in a hneh.

Inkhel dangah champion tura rinkai zinga mi Sofia Kenin a tla. Australian Open nomawi kawl mektu hi Elise Mertens lakah 6-3, 6-3 in a chak lo. Belgian player hian Karolina Muchova hnehtu Victoria Azarenka a hmachhawn ve leh thung ang.