Atletico hmaah Bayern

Atletico Madrid-in tun season Champions League match hmasa berah champion lai Bayern Munich 4-0 in an hneh lo. Diego Simeone hote hi nasa takin La Liga lamah insiamṭha mah se Europe inelnaah erawh group stage paltlang lo thei dinhmunah an ding.

Zanin dar 1:30 hian Atletico-in Bayern an mikhual dawn a, an hmalam hun club dang result-a an innghah lohna turin chak a ṭul. Spanish club hian tun season-ah German club chauh hi hneh loh an la tawng a, zanin hian phuba lak ngei an duh ang.

Atletico forward Luis Suarez chuan, "La Liga leh Champions League hi chu inelna dang hlak a ni a, season ṭantirha Bayern Munich kan hmachhawn kha chuan kan la inpeih lo. Kan intawn hmasak khan goal hmaah kan hriam tawk lo a, kan insiamṭhat theih chuan kan el tawk ang," tiin a sawi.

Simeone hote hi La Liga-ah pahnihnaah awm mah se pakhatna Real Sociedad aiin point khat chauhin an hmu tlem a, match hnihin an khel tlem zawk. Hemi a nih avang hian zanin inkhel tur hi tun dinhmuna German club ṭha ber leh Spanish club ṭha ber tiin a sawi theih.