Thiem leh Medvedev an kal fawr

US Open mipa singles champion thar an awm dawn a, Grand Slam nomawi la chawi ngai lo player pariat zinga pakhat chuan a chawi ngei dawn. Hlawhtlin tuma in um zingah Dominic Thiem leh Daniil Medvedev te an kal fawr hle.

Thiem leh Medvedev ten harsatna nei loin quarterfinal an lut tawh, zanin hian an inlan zui dawn; an khingpui ve ve an hneh a nih chuan semifinal-ah an inhmachhawn dawn, rinkai zinga pakhat zawk chuan final an lut dawn lo tihna a ni.

Nizan khan Alexander Zverec-a'n Borna Coric a hmachhawn a, German tlangval hi a tlang a nih chuan vawiina Pablo Carreco Busta leh Denis Shapovalov inkhel a chak zawk nen final luh an inchuh zui ve leh bawk ang.

Thiem a fim

Novak Djokovic a tla tawh a, Roger Federer leh Rafael Nadal an inlan loh bawk avangin Thiem hi rinkai bera chhal ngam a ni, Serbian tlangval a tlak hnuah phei chuan seeded pahnihna a nih avangin a ranking a sang ber.

Nimin zing khan Arthur Ashe Stadium-ah Thiem a inlan a, a khingpui seeded 15-na Felix Auger-Aliassime chu darkar hnih leh minute sarih chhungin 7-6 (7-4), 6-1 6-1 in a hneh, a service vawi khat chauh a hloh.

Auger-Aliassime hian a match hmasa zawkah a chet ranna leh ball vuak natna hmangin Andy Murray a hneh. Austrian tlangval lakah erawh a duh angin a khel thei lo, inkhel kal lai chu boruak siam tum viau mah se Thiem a talbuai duh lo, a 'cool' tlat.

Thiem chuan, "Set khatnaah ka hun ṭha hmasa ka bawhpelh a, vannei takin tie break-ah set ka la. Kan inkhelh hma khan a harsa dawn tih chu ka hre lawk, set hnuhnung pahnihah erawh inkhel ka thunun theih avangin a awlsam," a ti.

Austrian tlangval hian zaninah quarterfinal a khel zui dawn, kum 21 mi Alex de Minaur nen an inhmachhawn ang. Last 16 inkhel dangah Australian player hian seeded 21-an Vasek Pospisil chu 7-6 (8-6), 6-3, 6-2 in a lo hneh ve bawk.

Set hloh lo

New York khawpuia inelna neih laiah Daniil Medvedev-a'n match li a khel tawh a, set a la hloh miah lo. Russian tlangval hian nimin zing khan darkar khat leh minute 38 chhung lekin tualchhung tlangval Frances Tiafoe chu 6-4, 6-1, 6-0 in a hneh.

Season hmasa finalist hian quarterfinal-ah amah ang bawka Russian player Andrey Rublev a hmachhawn leh ang, inkhel dangah Rublev hian seeded parukna Matteo Berrettini chu 4-6, 6-3, 6-3, 6-3 in a lo ngam ve bawk, Russian player pahnih hian zaninah inkhel hmuhnawm an chhawp chhuak ang.

Kum 24 mi Medvedev chuan, "Ka sawi tawh ang khan Grand Slam-ah chuan set thuma chak theih hi chu duhthusam a ni, set hloh loa ka kaltluang hi ka vannei takzet, tunah chuan match lehpek atan rilru thawl takin hun ka hmang thei ang," a ti.

Seeded pathumna Medve-dev leh Rubev te hi an inhriatna a rei tawh, kum 22 mi Rubev naupang zawk hret mah se junior huangah pawh an lo inkhel tawh ṭhin. Tun ṭumah hian seeded 10-na a nih phak ve tho avangin chak zawk tur rin thiam a har hle.

Rubev chuan, "Naupang kan nih lai aṭangin court chhungah kan inel thei hle, racquet tih chhiat leh mi sawisel pawh kan hrat. Tlawm duh lo, inkhelh apianga theihtawp chhuah ṭhin a nih avangin kei pawhin ka theihna zawng zawng ka hmang ang," a ti.