India Squad-ah Mizo panga

India coach Stephen Con­stantine-a'n World Cup qualifier khel tur player 38 awmna squad a puang a, Mizo panga an tel.

India hian June 11 leh June 16 khian 2018 World Cup Preliminary Joint Qualification-ah Oman leh Guam an hma­chhawn ang. Player 38 awmna squad hi I League khelh zawh hunah player 26-ah sawr zim a ni ang.

Vanglaini palaiin India coach a kawm ṭum­in Bengaluru pla­yer pawimawh Lalchhuan­mawia leh Beikhokhei Beingaichho a koh loh chhan a zawt a, English coach chhanna chu hna thar chelh chauh a nih avangin I League match a la en hman loh thu a ni.

Tunah chuan India coach-in player zirchian nan hun a ngah ta bawk a, Lengpui tlangval Chhuantea chu India probables squad-ah telh a ni. East Bengal defender Robert Lalthlamuana bakah Royal Wahingdoh defender Lalchhawnkima leh Lalhmangaihsanga(Sena) te telh an ni. Mizo defender pathum Chhuantea, Robert leh Sena te hi left back vek an ni.

Mak angreng tak chu India squad-a koh Mizo panga zinga pali hi defender an ni a, Mizo zinga tlar hmaa koh awmchhun chu Jeje Lalpekhlua a ni. East Bengal midfielder Lalrindika Ralte inhliam vanga koh a ni lo a, hei vang hian midfield-ah Mizo player an awm lo.

Bengaluru duo Beikhokhei leh keeper Lalthuammawia Ralte te bakah Pune midfielder Lalrempuia-te chu India squad-a tel thei awm tak, thlan si loh an ni.

Keeper-ah hian Norway club ṭha Stabaek FC tana khel Gurpreet Singh Sandhu chu koh a ni.

Mizo hmel tharte

India squad-a a vawi khatna atana lang pathumte hi i bihchiang teh ang:

Chhuantea hi Mizoram aiawha sub junior football khel ṭhin, JCT Football Academy aṭanga inzir chhuak niin JCT leh Lajong lamah pawh a lo khel tawh.

Mualcheng tlangval Sena hian sub junior leh junior-a Mizoram tana a khelh hnuah Royal Wahingdoh hi a zawm a, hun rei tak chhung an player rinrawl a ni tawh.

Champhai tlangval Chhawnkima hi RW chet ṭhat chhan, an player langsar pawl a ni a, Mizoram-a club hrang hranga a khelh hnuah kum hnih kal ta khan RW hi a pan ta a ni.

Mizo player pathum - Robert, Chhuantea leh Sena-te hi left back vek an ni a, khelh an inchuh dawn a ang hle!

India Squad chu

Goalkeepers: Subrata Paul (Salgaocar SC), Arindam Bhattacharya (Kalyani Bharat FC), Gurpreet Singh Sandhu (Stabaek FC), Sanjiban Ghosh (Mumbai FC).
Defenders: Rino Anto, Lalchhuan­mawia (both Bengaluru FC), Reagan Singh, Lal­hmangaihsanga, Lal­chhawn­kima (all Royal Wahingdoh FC), Pritam Kotal, Dha­nachandra Singh (Mohun Bagan), Robert Lalthlamuana, Arnab Mondal, Gurwinder Singh (all East Bengal), Sandesh Jhingan (Sporting Clube de Goa), Augustin Fer­nandes (Salgaocar SC), Aiborlang Khongjee (Shillong Lajong FC).
Midfielders: Cavin Lobo, Md. Rafique, Har­manjot Singh Khabra (all East Bengal), Eugen­son Lyngdoh, CK Vi­neeth (both Bengaluru FC), Godwin Franco, Jackichand Singh, Sai­tyasen Singh (all Royal Wahingdoh FC), Sehnaj Singh (McDowell Mohun Bagan), Dhana­pal Ganesh (Pune FC), Mandar Rao Dessai, Francis Fernandes, Germanpreet Singh (all Dempo SC), Rowlin Borges (Sporting Clube de Goa), Bikash Jairu (Salgaocar).
Forwards: Sunil Chhetri, Robin Singh (Both Bengaluru FC), Holicharan Narzary (Dem­po SC), Jeje Lalpekhlua (Mohun Bagan), Thongkhosiem Haokip (Pune FC), Sumit Passi (Sporting Clube de Goa).