Hawks vs Cavaliers

NBA Playoff Eastern Conference final-ah Atlanta Hawks leh Cleveland Cavaliers te an inhmachhawn dawn a, vawiin zing dar 6:00 hian Philips Arena, Atlanta-ah Game 1 an khel ang.

Regular season-ah team pahnih November 15 khan an inkhel a, Cavaliers-in 127-94 in Hawks hi an sawp. Decem­ber 17-ah erawh result dang kan hmu a, Atlanta-in 127-98 in Cleve­land an sawp ve thung. December 30-ah Atlanta an chak hram a, 108-101 in Cleveland lakah hnehna an chang a, March 6-ah Atlanta bawk an chak.

Playoff final thlenna kawngah erawh Cavaliers an che ṭha zawk a, Hawks hian final thleng turin a huntea par chhuak ṭhin Lebron James an dah theih a pawimawh. Playoff-a Cleveland score zawng zawng aṭanga 27% hi James-a khung a ni a, Kyrie Irving-a'n 20% a score ve bawk.

Hawks tan Jeff Tea­gue a pawimawh ang. Kum 26-a upa point guard hi Hawks-in New Jersey Nets leh Washington Wizards an hnehna kawng­ah a ṭangkai hle.

Atlanta Hawks hian season khata player hlawh atana an pawisa hman hi dollar maktaduai 58.3 a ni a, Cavaliers-in hlawh atana an hman zat hi dollar maktaduai 82 daih a ni. Hlawh pek zat aṭanga chhutin Cavaliers an sang fal a, record aṭanga thlirin Hawks an ṭha zawk. Eastern Conference final hi a hmuhnawm ang.

Nimin zing khan Western Conference final Game 1 khelh a ni a, Golden State Warriors-in Houston Rockets 110-106 in an hneh hram. Warriors guard Stephen Curry chuan second tlemte chauh a awm tawh tihin free throw ṭum hnih a lut a, point 34 zet a score.

Warriors hian second quarter-ah point 16 laiin an hnem zawk a, Rockets center Dwight Howard khup hliam vangin fourth quarter a khel thei lo a, hei hi Warriors in an hmang ṭangkai ta a ni.