Boca dilna CONMEBOL in hnawl

21st May, 2015

South America a football thuneitu sang CONMEBOL chuan Copa Libertadores aṭanga an paihchhuah Boca Juniors-in ngaihdam an dilna chu an hnawlsak.

Argentine club Boca Juniors hian Ningani khan an khelmualah River Plate an lo mikhual a, goal inpe loa an inhnehtawk mek laiin fan ṭhenkhatin River Plate player te 'pepper spray' hmanga an lo kah avangin CONMEBOL chuan Copa Libertadores aṭangin Boca Juniors hi a paichhuak a, 3-0 a chak lo zawkah puangin $200,000 an chawi tir bawk.

CONMEBOL thuchhuak chuan an dinna ngaiah an din reng thu leh Boca Juniors hremna chu kaltangpui a nih tur thu an puang a ni.