Arsenal an chak lo

Mikel Arteta chuan a din-hmun a derthawn loh thu a sawi. Spanish manager thusawi hi Arsenal ṭantute tana thu lawmawm nge lawmawm loh tih chu buk tham a ni ang. Gunners hian 1981 hnu lama Premier League season bul an ṭan chhiat ber ṭum an hmang mek.

Pathianni zanlai EPL inkhelah Arteta naute hi an mikhual Wolverhampton Wanderers lakah 2-1 in an tlawm. Tun season league match 10 an khelh aṭanga vawi nga an tlawmna ni tawhin, Emirates Stadium bika an match hnuhnung pathumah an chak lo vek!

Arsenal leh Wolves hian tun season bikah goal an khung tlem a, inkhel hmuhnawm an chhawp chhuah ṭhin loh avangin sawisel an hlawh. Tun ṭuma thil thleng langsar hmasa pawh David Luiz leh Raul Jimenez te intauh a ni daih.

Ball kang tauh an tumna lamah Luiz leh Martinez te na takin an intauh. Mexican striker hi minute 10 chhung vel buaipui a ngai a, chumi hnuah damdawi inah hruai a ngai hial - Brazilian defender pawh chawlhlawkah thlak a ni.

Mikhual lamin goal an nei hmasa, Adama Traore thawh rah chu Pedro Neto chuan minute 27-naah a pet lut. Goal luh aṭanga minute thum hnu lekah Willian ball pet chu defender Gabriel-a‘n tauh lutin a sut.

Portuguese winger Neto-a‘n hun ṭha nei lehin a shot chu keeper Bernd Leno chuan rang zetin a lo dansak a, ball per dawngtu Daniel Podence chuan an goal hnihna leh chakna goal ni bawk turin a khung.

Arsene Wenger chhuah hnuah Unai Emery an nei a, an beisei a phak loh avangin an ban. Season hmasa laklawh laiin Arsenal hian an captain hlui Arteta chu coach atan an lalut, FA Cup a chawipui nghal avangin beisei an nei sang hle.

Amaherawhchu, 'Mahse' tia sawi zawm a ngai ta. Attacking game hmuhnawm khel ṭhin khan goal an khung thei lo a, striker Pierre-Emerick Aubameyang pawh player naran ang maiin an chhuah.

Gunners manager Arteta chuan, "Coaching ka luhchilh dawn khan, engtik niah emaw chuan team ka la enkawl ve ang a, engtikah emaw chuan min la ban vei ngei ang tih pawh ka ngaithuah lawk vek. Hei chu football ken tel a ni.

"Tun dinhmunah chuan ban lam chu ka rilruah a awm lo, kei chuan ka naute hi an ṭhat dan bera khel chhuak tur leh Arsenal hi a sang thei ang ber thlenpui hi ka tum ber a ni,“ tiin beisei a la neih thu a sawi.