Mumbai Indians-in Chennai Super Kings an barakhaih

Thawhleni zanah India Premier League table a pakhatna Chennai Super Kings leh pahnihna Mumbai Indians te an inkhel a, beisei loh zawk Mumbai-in run 25 a hnehna changin IPL 2015 final an lut ta.

Wankhede Stadium, Mumbai-a inkhelah hian mual neitu Mumbai Indians an bat hmasa zawk. Mumbai tan an opener pahnih Lendl Simmons leh Parthiv Patel te an che ropui nghal.

West Indies batsman Simmons hian ball 51 a hmachhawnah run 65 siamin a team tan a thawhhlawk hle. Wicketkeeper batsman Patel hian ball 25 hmachhawnin run 35 a vawchhuak thung.

Captain Rohit Sharma chu run 19 a vawchhuak hman chauh tihin a out a, mahse Kieron Pollard a rawn dingchhuak ve leh. West Indies batsman hian ball 17 a hmachhawnah run 41 vawchhuakin a batting a hmuhnawm hle.

Chennai Super Kings tan Dwayne Bravo leh Mohit Sharma te an khel ṭha a, wicket thum ve ve an la.

Mumbai Indians hian over 20-ah run 187 hlapchhuakin mi paruk an hloh a, target pangngai tak an siam.

Chennai Super Kings-in theihtawp chhuahin an target an um a, table-a pakhatna hian final luh an phu zia tihlan an tum. Mahse, khualmualah Chennai batsman te an che hleithei lo a, an mualpho.

An opener Dwayne Smith run siam miah loa a out hnuah lawk opener tho Michael Hussey chu run 16 a siam tihin a out ve nghal.

Chennai tan India bastman duhawm Suresh Raina a rawn che ropui dawn viau emaw tih laiin ball 20-ah run 25 a vawchhuak hman ṭawk tihin veteran bowler Harbhajan Singh kutah a out. A hun takah India spin bowler Harbhajan a che a, Chennai beiseina neih chhuan captain Mahendra Singh Dhoni chu a ball vawm vawikhatah a vawm out nghal.

Over 19 thleng chiah Chennai-in an tlin. Mi sawm hlohin run 162 an vawchhuak hram a, run 25-in table lama an hnuaia awm Mumbai Indians an ngam lo.

Qualifier 1 a chak lo zawk team tan beisei a la bo lo. Eliminator round-a Royal Challengers Bangalore leh Rajasthan Royals inkhela chak zawk zawk Qualifier 2-a inkhelh pui turin an lo nghak ang.

Nizan dar 8:00 khan Eliminator round hi khelh a ni a, a result kan hre hman lo.