Award sem zanah Van Gaal a langsar

Manchester United-in Thawhlehni zan khan award semna hun an buatsaih a, player of the year dawngtu David de Gea leh player dangte aiin manager Louis van Gaal-a thusawiin sawi zui a hlawh zawk.

Dutch manager Van Gaal hian nal takin saptawng a hmang ngai lo a, saptawnga interview a pek tawh chuan a tawng ban deuh chut zel. Chutihrualin tlang taka thusawi chi a nih bakah a tawngkam bungraw neih ang chhun a hmang thiam a, inthlahrunnna nei miah loa a ṭawng ṭhin avangin thusawi thiam tak a ni hrim hrim.

Van Gaal-a'n Manchester United a zawm tirh pawh khan press conference hmasa berah journalist pungkhawmin a thusawi an ngaithla ṭhup a, a hma chiaha manager David Moyes nen inelna ṭan hma hauhin an inthlau tih chu sap media lam tarlan dan a ni.

Fans a fak

United-in season ṭan tirh match 10-ah point 13 chiah an hlawhchhuak a, chutichung chuan fan-te'n an club ṭan an phatsan lo. Dutch manager chuan United ṭantute chu khawvela ṭha ber an nih thu uar takin a sawi.

Result an neih ṭhat loh hnua an meeting neih ṭum a sawi chhuak a, captain Wayne Rooney-a'n pahnihna an la nih theih thu a sawi ṭumte chu a sawi lang leh. Boruak hnek paha kan thei a ni a tih te chuan a thusawi ngaithlatute lawm a hlawh hle.

Manchester United-in point 15 zetin champion Chelsea an pha lo nachungin champion thei dinhmuna an din thu a sawi nawn a, player rilru put hmang chu a fak tel bawk.

Season tharah chuan...

Van Gaal chuan, "Champion ka tiam thei lo che u a, ka tih theih chu kan theihna zawng zawngin kan khel ang tih hi a ni. Season thar ṭan hmain fing takin transfer hun hman kan tum dawn a, season liamta khan kan player thlan dan a rual khai lo a, chuti chung chuan palinaah kan awm. Player ṭhenkhat chuan kan hma lakna tur hi an tuar dawn a, amaherawhchu Manchester United anga club ṭha tan chuan player zawng zawng tih lawm hi a theih loh," tiin season thar chungchang a sawi a, player an in siksawi tur thu a tarlang tel bawk.

Premier League harsatzia sawi belhin, "Fans-in hlawhtlinna an duh ang bawkin Manchester United board te hi nomawi duhin an tui hal a, mah se champion hi a awlsam lo. Chelsea result aṭang khan a chiang mai awm e, Premier League champion-in table hnuai lama awm West Brom 3-0 in an hneh lo. Germany leh Spain aiin England hi a harsa daih a ni," tiin a sawi.

Fan-te hriatthiamna ngen lawk­in Dutch manager chuan, "Uluk taka ngaihtuah chungin player kan hralh anga, kan la lut bawk ang. Hei hi fan-te'n kalphung pangngai a ni tih hre lawk turin ka duh," a ti.

An sawi zui

Spanish midfielder Juan Mata chuan, "Season tluanin kan hrawn tawh a, meeting vawi engemaw zat kan nei a, a khawsak duh dan kan hria. A thusawi ngaihthlak hi a hlimawm a ni," a ti.

Manchester United captain hlui Gary Neville chuan, "A thusawi khan min hneh takzet. Hun hlimawm tak a ni a, minute 20 chhung nuam ka tih ber zing ami a ni ngei ang," tiin United boss thusawi chu a fak hle.

England cricket captain hlui Michael Vaughan, "Thusawi tawh a zawnga ṭha ber a ni," tiin Van Gaal thusawi chu ropui a tih a thu a sawi.

Award chu

Manchester United keeper David de Gea chu Players' Player of the Year leh Sir Matt Busby Player of the Year atana thlan a ni. Sir Matt Busby Player of the Year hi khawvel pumpuia United ṭantute thlan a ni a, De Gea hian a kum zawna a dawnna a ni.

Liverpool lama nalh taka volley luttu Juan Mata-a'n Goal of the Season lawmman a dawng bawk. Brazilian midfielder Andreas Pereira-a'n U21s Player of the Year award a la a, a ni hi Under-21 Premier League a Manchester United champion-na kawngah a pawimawh hle. Kum 17-a upa Axel Tuanzebe-a'n Under-18s Player of the Year award a dawng bawk. Tuanzebe hi Under 18 captain a ni.