Messi leh Federer khaikhintu Cassano
Italian striker Antonio Cassano chuan tunlai khawvel a footballer ropui ber pahnih Lionel Messi leh Cristiano Ronaldo te chu Tennis player Roger Federer leh Rafael Nadal te nen a khai khin.
Kum 32 a upa Cassano hian Argentine forward Messi chu Tennis khel thiam Federer nen a khai khin bakah Real Madrid winger Ronaldo chu Spanish star Nadal nen a khaikhin bawk. Football leh Tennis hi infiamna inang lo tak ni mah se heng mi palite hi tunlai khawvela a ṭha ber ber an nih avangin a khaikhin kual vel pawh hi a awm viau tho mai.
Khawvel a mihring maktaduai tel awmkhawm zingah ngaihdan in ang vek a neih theih loh avangin player ṭha ber tia sawi hi thil theih a ni ngawt lo a, amaherawhchu an thil tih leh hnathawhte avanga midangte tluk loh leh chungnung bik hi chu an awm chiang.
Mi tam takin Pele hi khawvel footballer ropui bera an chal laiiin ṭhenkhat chuan Diego Maradona an dah chungnung zawk thung. Tunlai football khawvelah chuan Messi leh Ronaldo te hi tuma thik phak loh khawp che ropui an ni thung. Messi hian Ballon d'Or vawi li dawng tawhin Ronaldo hian vawi thum a dawng tawh thung a, kuminah pawh hian anni pahnih aṭang hian a tu emaw zawk chuan a dawng leh ngei ang.
Real Madrid player hlui Cassano chuan, "Ka ngaihdan chuan Messi hi khawvel a player ropui ber ala ni a, ka fapa hmingah pawh ka phuah ve hial. Maradona leh Pele te chu an ropui teh meuh mai, mahse kan inkhelh dan lehkalphung a danglam tawh avangin Leo hi an tluk ka ti lo. Ronaldo pawh hi player ropui tak chu a ni a, anni pahnih hi thiam dan leh khelh hmang inang lo an ni. Mahse chiang tak chu khawvela a ṭha ber pahnih chu an ni. Football leh Tennis hi khaikhin dawn ila chuan Messi leh Ronaldo hi chu Federer leh Nadal nen an inang ang," tiin a sawi.