CYMA FOOTBALL Final-ah inkhelh thiam khua Lengpui

Thingtlang khaw lian tak ni loh mah se inkhel thiam khua tih hi an larna a ni ṭhin. Tunah pawh an thiam zia lantirin cham­pion tura mipui rin rawn Bawngkawn hnehin CT Group Cup, CYMA Inter Branch Football Tour­nament 2015 final an lut.

Thawhlehni zan inkhelah hun pangngaiah goal khat ve ve an khung a, extra time-ah goal khat ve ve khung lehin penalty shootout-ah Lengpui 5-3 in an vannei zawk.

Semifinal hmasa zawka Dinthar hnehtu Armed Veng leh Lengpuite hian April 22 khian Lammualah final an khel ang.

Inkhel chu

Entu mipui an ṭhahnem hle. Mipuiin CYMA foot­ball an hlut a, final-ah phei chuan an tam lehzual ang.

Lengpui lam an fimkhur a, midfield-ah player panga an dah ṭhawt a, hming langsar ber chu Aizawl FC midfielder Rohmingthanga a ni. Tlar hnunga ding captain Thangliana leh JS Hmar te erawh dah hniam theih an ni lo, an vanglaia Mizoram defender ṭha an ni.

Bawngkawnin MPL-a sulhnu nei ṭha H. Lalmuankima, MS Dawngliana, MC Malsawmzuala leh Lalnuntluanga te an nei a, minute kuana leka goal khungtu erawh hming langsar lo ber Lalhmunsiama a ni.

Goal luh hnuah Bawngkawn attacking na tho mah se goal an khung belh lo a, semifinal-a Bawngkawn hero keeper MC Lalneihsanga chetfuh tawk loh vangin Lengpuiin Isaak Lalrem­ruatkima hmangin an siphurh an sut.

Extra time-ah Bawngkawn tan Dawngtea a rawn inlar a, MPL1 top scorer Dawngtea hian minute 96-ah goal khungin Bawngkawn 2-1 in hma a hruai a. Bawngkawn hi an chak tlang tawh mai tura rin a nih laiin Lengpui an beidawng duh lo a, Joe Zoherliana tauh luh hmangin an si phurh an sut ve leh a. Minute 120 chhungin 2-2 in an inhnehtawk.

Penalty an pet a, Chanmari FC winger MK-a chiahin a pet lut lo a, penaltyshootout-ah Lengpui an chak.

Vanduai leh Vannei

Bawngkawnin goal khungna hun ṭha an neih an hman ṭangkai tawk lo a, Dawngtea'n crossbar vawi hnih a tih per bakah MK-a'n vawi khat a tih per bawk.

Lengpuiin chak turin vanneihna an nei a, tawnhriat an nei tel bawk. Coach game plan ti hlawhtling tura midfield-a Rohminga che vel leh tlar hnunga Thangliana leh JS-a te hnathawh hmuh hmaih chi a ni lo.

Eng nge an sawi?

Bawngkawn manager K Lalrinawma chuan, "Kan hun ala thleng lo ni berin ka hria, inkhel kan thununin goal khungna hun ṭha pawh kan insiam nual a mah se a pawimawh goal kan khung thei si lo. Lengpui lam khan an hun ṭha neih chhun an chhawr ṭangkai zel bawk nen kan vanduai a ni e. Veng mipui leh Local Council ten min ṭawiawm ṭha em em a, anni zara hetiang dinhmun thleng thei hi kan ni, an beisei leh duh ang kan thleng zo lo erawh a pawi ka ti," tiin a sawi.

Lengpui manager R Thanngura chuan, "Kan thawhrim leh taihmakna Pathianin mal a sawm a ni e. Ka beisei ang ngeiin mipuiin min ṭawiawm ṭha a kha kha kan chak chhan a ni bawk. Bawngkawn kha team ṭha zawk an ni tih chu kan hre vek a mah se football-ah chuan thil engpawh a thleng thei a, kan hneh thei tih kan hria, chumi tur chuan kan bei bawk. A tawpah kan hlawhtling a ni," tiin a sawi.

Penalty chungchang sawi chhun­zawmin Thanngura chuan, "Kan practice apiangin penalty pet leh goal ven hi kan zir ziah a, chu chu atakin kan hmang chhuak thei. Tun tournamnet-ah hian penalty hmangin kan vawihnih chakna a ni a, kan la pet goal vek bawk a kan lawm hle a ni," tiin a sawi.