Ticket-ah hming ziak sual
Thawhṭanni khian Championship playoff final-ah Middlesbrough leh Norwich City an inkhel dawn a, ticket zawrh chhuah tawhah Middlesbrough tih turah 'Middlesborough' tih a ni.
Ticket tihsual vang hian Wembley Stadium official-te chuan thuchhuah siamin, "Wembley Stadium chuan club hming tihsual vangin Middlesbrough FC leh supporter-te chungah ngaihdam kan dil a, tihsual palh liau liau a ni. Kan tihsual hian in inkhelh turah nghawng a neih loh ngei kan beisei. Ticket hi siam ṭhat a ni dawn lo a, final en nan a hman theih ang," an ti.
Middlesbrough hian final thleng turin Brenford chu double legged semifinal-ah 5-1 in an hneh a, Norwich City hian Boro hmachhawn turin Ipswich Town an hneh ve bawk.
Inrinni zan khan Norwich-in ticket an zuar chhuak nghal a, darkar reilote chhungin ticket 15,000 hralh a ni. Norwich hian an ticket chan hi mi nazawng tana lei theih turin an zuar chhuak dawn lo a; season ticket neitu, away season ticket neitu, member thlan bik leh shareholder te chauhin an lei thei ang.
Norwich thuchhuak chuan fan-te chu social media kaltlanga ticket phochhuak lo turin an ngen a, a chhan chu ticket thliar hranna barcode chu ticket lem siam nana a lakchhawn theih vang niin an sawi.
Championship aṭangin Bournemouth leh Watford season thara Premier League khel turin an tling tawh a, Norwich leh Boro hian hmun ruak pakhat la awm an inchuh ang.