Mizoram hmeichhe team an kal zel

National Sub Junior Championship for Girls, Cuttack-a khelhah Mizoramin quarterfinal-ah an group-a awm team pathum hneh vekin semifinal an lut.

Nimin zing khan Mizoramin group match hnuhnung berah Bihar 3-1 in an hneh a, Mizoram tan Lalchhanhimi, Vanlalhriati leh Offee Lalhmingchhuanpuii te'n an khung.

Mizoram hian semifinal thleng turin harsatna an tawk lo a, an match hmasaah inelna thlengtu Odhisa chu 3-0 in an hneh a, match hnihnaah Chandigarh 19-0 in an sawp leh bawk.

Zirtawpni khian Mizoramin semifinal-ah Jharkhand an hmachhawn dawn a, Haryana-in Mizoram laka tlawm Bihar an khelh pui ang.

Mizoram manager Lalnunsanga chuan, "Bihar laka goal kan chhuah hi pawi kan ti a, chutihrualin freekick aṭanga crossbar an pet per hnua lut a nih avangin tih theih kan nei tlem hle. Kan tlar hnung hi a phui ṭha thawkhat a, sawiselna tur kan nei lo. Kan tlar hma lam erawh kan goal khung zat en hian an ṭha tawk tih a chiang hle," tiin an khelh dana a lungawi thu a sawi.