Al Sadd-ah Xavi
Barcelona captain Xavi pa Joaquin Hernandez chuan a fapa in season tharah Qatar club Al Sadd a pan tur thu a sawi. June-ah hian Barcelona-a Xavi contract neih lai a zawh tawh dawn avangin a contract hi an pawtsei a nih loh chuan a duhna lam a hawi thei dawn.
Xavi hian Nilaithawhṭanni khan thuthar thehdarhtute a kawmnaah a hmalam hun chu season tawpah a sawi chauh tur thu sawi mah se apa thusawi avang hian tun season tawp rual hian Barcelona a chhuahsan ngei dawn niin a lang.
A vanglaia khawvel midfielder ṭha ber pawl Xavi hi kum 35 a tlin ve tawh avangin a vanglai a pel tawh a, tun season-ah pawh a khel tam tawh loh hle. Tunah hian kum thum cham turin Al Sadd-ah a kal dawn tih thu thang a tam tawh hle a,a pa a ṭawng chhuak pawh hi a awm lo hran lo.
Xavi-a pa Joaquin Hernandez chuan a fapa chungchang sawiin, "A football nun zawng zawng hi Camp Nou-ah hman zawh vek a duh a, mahse duhthusamin thil hi a kal vek thei kher lo. Kum 35 a nih tawh avangin atan Barca a hmun nghet chan hi thil harsa a ni tawh tih chu a chiang. Al Sadd aṭangin sawmna a hmuh avangin Barca hi a chhuahsan lo ang tih hi sawi a harsa tawh," tiin a sawi.
Spanish midfielder Xavi hian a in zirchhuahna Barca tan hian kum 1998 aṭang khan first team-ah hmun a chang a, a club tan hian champion nomawi a chawi hnem tawh hle.Chung zingah chuan La Liga vawi riat, UEFA Champions League vawi thum, Copa del Reys leh FIFA Club World Cup vawi hnih ve ve a chawi tawh a ni. Tunah hian Champions League leh Copa del Reys chawi leh mai thei dinhmunah a ding mek bawk.