Persian Gulf Pro League tawp dan a ngaihnawm

Bundesliga-ah Bayern Munich an champion hma lutuk a; Juventus, Chelsea, Barcelona leh Paris St Germain te'n season tawp boruak sang lutuk loin an ram league-ah ṭheuh an champion bawk. Per­sian Gulf Pro League tawp dan erawh a dangdai hle, league match tawp ber khelh zawhah champion lo zawk team-in champion emaw an lo inti.

Iran league sang berah Tractor Sazi an la champion ngai lo a, league match tawp ber khelh hmain anmahni hnaih bertu Naft Tehran nen point 57 ve ve an hmu a, Sazi goal difference-a ṭha zawk. A sang pahnih hi match hnuhnung berah an inhmachhawn avangin Sazi tan Tehran chunga awm turin draw a tawk a, amaherawhchu pathumna Sepahan an chak chuan point 59 an hmu anga an champion daih thei tihna a ni.

Tractor Sazi-in bul an ṭan ṭha a, Naft Tehran lakah 3-1 a hma an hruai avangin kum 52 chhung an nghah tawh chu an nghak chhuak dawn niin a lang. Amaherawhchu Bolton Wanderers midfielder hlui Andranik Teymourian chu hnawhchhuah a ni a, Sazi-in player 10-a an khelh hnuah goal hnih an chhuah a, minute 81 a nih meuh chuan 3-3 a ni. Season hnuhnung palia ṭum thum pahnihna ni tawh Sazi-in champion turin draw a tawkah an ngai a, hmun dang result an ngaihtuah hman tawh lo.

Benfica manager hlui Toni Oliveira chuan a team-te chu defensive game a khelhpui a, goal dang an chhuah belh tawh lo. Final whistle a rik chuan an champion emaw tiin team pumpui leh supporter-te field chhungah tlan lutin an sahawk chiam a, an hriat sual vang a ni.

Sazi chhim lam mel 560-ah Sepahan-in an khingpui Saipa 2-0 in an hneh a, Persian Gulf Pro League-ah an champion. Sazi lam pawhin result an hre ve vat a, supporter-in buaina an siam zui a, kum 68-a upa Por­tuguese coach Oliveira chuan buma an awm thu a sawi zui bawk.

Pathumnaa awm Naft Tehran chief executive Man­sour Ghanbarzadeh chuan, "Thil duhawm lo tak a thleng a ni. Inkhel dang result kha kan thlir reng a, minute 87-na a nih khan TV, radio leh cell phone a thawk lo a, result hre turin biak pawh ngaihna a awm lo. Chutihlai tak chuan Sepahan leh Saipa te 2-2 in an inhnehtawk tihin min hrilh a ni," tiin thil awm dan a sawi.

Thil awmdan nia lang ta erawh Tractor stadium enkawl­tuten mipui pungkhawm tam lutuk kara buaina chhuah loh nan an club champion thu an puang a, a hun laiin stadium official-te buaina pumpelh tum dan hi ngaihdan ṭha tak niin lang mah se buaina lian zawk thlentu a ni.