Chhuantea inhliam zanah Chennaiyin an nil
Pathianni Zan Indian Super League inkhelah Chennaiyin leh Kerala Blasters chu goal khung loin an inhnehtawk a, Chennaiyin defender Lalchhuanmawia Fanai chu hliam vanga lakchhuah a ngai.
Chhuantea chuan, "Ka tlan chak tur kha ka malpui lamah a lo inpawt deuh a, chuvang chuan lakchhuah ka ngaih phah ta a ni. Hliam na tak a nih loh ka beisei a, chiang taka sawi theih erawh a la ni rih lo," tiin Vanglaini a hrilh.
Chennaiyin hian Jakub Sylvestr penalty hmangin goal khungna remchang an nei a, mahse Slovakia international hlui penalty pet chu Aizawl FC goalkeeper hlui Albino Gomes chuan a dansak.
Lengpui defender Chhuantea bakah hian Lallianzuala Chhangte chuan inkhel bul a ṭan a, Chhuantea hi minute 44-naah Jerry Lalrinzuala chuan a thlak - Lianzuala hi minute 85-naah lakchhuah a ni bawk. Kerala Blasters lamin Mizo player K. Lalṭhathanga leh Lalruatthara kawl mah se an inlan lo thung.
Pathianni zan inkhel hmasa zawkah Jamshedpur FC chuan Nerijus Valskis hmangin 2-0 in hma hruai hman mah se Odisha tan bench aṭanga luhtir Diego Mauricio chuan si phurh hi a sut zo a, 2-2 in an ṭin.
JFC tan Laldinliana Renthlei, Ricky Lallawmawma leh Isaac Vanmalsawma ten bul an ṭan a, Odisha lamin minute 60-naah Daniel Lalhlimpuia luhtirin Samuel Lalmuanpuia chu minute 70-naah a lut bawk.
Jamshedpur tan Valskis-a'n minute 12-naah penalty hmangin a khung a, 27-naah a chhunzawm. Mahse, Odisha substitution a fuh a, Daniel, Samuel leh Mauricio-te an luh hnuin inkhel a danglam.
Brazil Under-20 international hlui Maurício hian minute 77-naah si phurh a sut ṭhen - JFC keeper TP Rehenesh chuan penalty area pawnah ball manin, Jamshedpur goal khungna remchang a dansak.
Rehenesh hi hnawhchhuah a ni a, a freekick chawi aṭanga ball kal zel hi Mauricio hian goal-ah a chantir a, hun pek belha a si phurh sut zawhna erawh Serchhip striker Daniel-a siamsak a ni.
Zanin ISL-ah inkhel pakhat a awm dawn a, dar 7:30-ah Mumbai City leh East Bengal an inkhel ang. Mumbai hian Hmingthanmawia (Valpuia) an kawl a, East Bengal-ah Jeje Lalpekhlua leh Lalramchullova an awm thung.
Kolkata derby-a inlan lo Jeje hi 100% in a la in fit lo a, mahse coach Robbie Fowler-a'n a duh chuan a chhawr thei ang - Chullova erawh December thleng hliam vangin a chawl dawn.