AC Milan an kang sang zel

Serie A nomawi inchuh boruak a ngaihnawm dawn. AC Milan chuan Alessio Romagnoli leh Franck Kessie te goal hmangin Fiorentina 2-0 in an hneh a, an mahni hnaih bertu Inter Milan lakah point hnih a sang chungin table hmahruaitu an ni.

Pathianni zan inkhel dangah Napoli chuan an chunga awm AS Roma 4-0 in an sawp a, inkhelh banah manager Gennaro Gattuso chuan a naute khelh dan leh rilru put hmang chu a duhzawng a nih thu a sawi chhuak.

Milan hi an coach Stefano Pioli chuan a la ho thei lo, Italian manager hian Covid-19 a kai avangin Serie A bakah Europa League lamah pawh a naute a ho thei lo a ni - Ningani zana Celtic an hmachhawn tur atan pawh a dinhmun a la chiang lo chhunzawm.

Season duhawm an hman theih nana mi pawimawh Zlatan Ibrahimovic chu hliam vangin a inlan thei lo, Swede striker bakah hian Rafale Leao, Ismael Bennacer leh Samu Castillejo te an chawlh a ngai bawk. An ṭhat dan berin Milan inlan thei lo mah se an buai chuang lo, minute 17-naah vengtu nei lo defender Romagnoli chuan corner aṭanga ball lo kal a tauh lut a, chawlhlawk hmain Kessie-a'n penalty a khung belh bawk.

Pioli-a naute hi season hmasa tawp lam aṭang khan a harh thar a, season kal laiah pawh an harhna hi an vawng nung chhunzawm. Season kua ngawt mai a zawna Juventus rorelna ti tawp turin kawng dik an zawh mek zel a ni.

Napoli tan Lorenzo Insigne-a'n freekick aṭanga a goal hmahruai khung chu Diego Maradona tan a hlan a, a hnu lamah hian Ruiz, Dries Mertens leh Matteo Politano te khung belh lehin an mikhual Roma lakah zahngaihna an lantir lo.

Gattuso naute hian match kua aṭanga point 17 hmuin pangana an ni, an chunga awm Juventus nen an point a inzat. Hri leng vanga Old Lady an hmachhawn theih loh ṭumin chak loa puan an ni a, an point hmuhsa aṭangin point khat paih an ni tawh bawk.

Italian manager Gattuso chuan, "Inkhel zawng zawngah tun ṭum ami ang hian khel chhuak thei ila tih hi ka duhthusam a ni. Training-na hmun, awmkhawmna leh dressing room boruak thlengin a nuam - chumi hnuah khelmualah a nawmna kan tel zui," tiin a sawi.

Napoli tana Serie A nomawi chawi tawh Maradona chungchang sawi zuiin Gattuso chuan, "Maradona chu legend a ni, a thihnain Naples khawpui a nghawng nat dan pawh ka hria, mi bik an thi a nih chuan hetiang hi a thleng tur pawh a ni. Khelmual chhungah erawh rah ṭha a chhuah thung ang," a ti.