Olympic beiseitu Saina Nehwal

Saina Nehwal chuan season harsa tak hmang mah se beiseina a la nei, nakkuma neih tur inelna lian leh ngaihhlut ber Tokyo Olympic khelh theih ngei chu a tum leh duhthusam a nih thu a sawi chhuak.

London Olympic bronze medalist Saina hi tun hnaiah a tlahniam, world ranking-ah pawh 22-na dinhmun a luah phak hram. Olympic-ah hian ranking sang zual 16 bak an inlan thei lo.

Japan khawpuia inlan turin Saina hian a ranking a siamṭhat viau a ngai dawn, season thara inelna an buatsaih thei a nih chuan a tam thei ang ber inkhelh a ngai dawn bawk tihna a ni. World number 1 hlui Saina chuan, "Olympic khelh hi player zawng zawng duhthusam leh thil tum a ni tih ka hria, kei pawhin ka dahsan ber a ni. Inelna lian hmachhawn turin kawng zawh tur thui tak ka la nei tih erawh ka hriat a ngai.

"Qualifying tournament tam zawk a awm theih ngei ka beisei a, ranking hniam zawkte tana insiamṭhat hun a her chhuak a nih chuan bawhpelh loh a ngai ang, chumi tur atan chuan player ṭha ka hneh theihna kha ka neih let leh a ngai," a ti. India aṭangin PV Sindhu chu a inlan dawn chiang a, Rio Olympic silver medalist bak hi dinhmun chiang an la awm lo. Saina bakah hian mipa world number 1 hlui Kidambi Srikanth pawhin beisei a la nei 

ve bawk.