Jon Jones-a'n a kawnghren a humhim

Mi tam takin MMA fighter ropui ber ang hiala an ngaihna chu Jon Jones chuan a rawn nem nghehsak leh ta a, nimin khan UFC heavyweight title a kawl lai chu fighter ropui Stipe Miocic lakah a humhim.

Madison Square Garden, New York-a in fight-ah Jones hian chak turin hun pawh a duh rei lo. Round thumna lekah Miocic hi back kick hmangin a titlu a, chak zawkah puan a ni.

Light heavyweight lama inlan ṭhin Jones hian March 2023 khan a vawi khat nan heavyweight fight a hmachhawn a, Ciryl Gane chu submission hmanga hnehin heavyweight title a hlawh chhuak nghal - a vawi khat nan a title humhim tumin fight a hmachhawn leh a, a humhim leh ta.

Chawlh tum lo

Jon Jones hian vawi 30 fight hmachhawn tawhin, vawi 28 hnehna a chang a, vawi khat chiah a la tlawm - a ngam loh awmchhun hi kum 2009 daiha a ngam loh tawh Matt Hamill kha a ni.

Jones chuan, "Ka la chawl mai rih lo mai thei. Biak tur ṭulte ka be phawt ang a, tihfel tur tam tak a la awm - kan beisei anga thil a kal tluang a, kan tifel thei a nih chuan in duh ang chu kan pe ang che u," a ti.

UFC 309 hi a hmunah US President atana thlan thar Donald Trump chuan enin, mipui lawm a hlawh hle - mi hausa tawntaw Elon Musk, musician Kid Rock leh UFC hotupa Dana White ten Trump hi an rawn ṭawiawm bawk a ni.

Miocic a chawl

Kum 42 mi Miocic-a'n heavyweight kawnghren a hlawh chhuak zo lo a, MMA a chawlhsan thu a puang zui. American fighter ropui chuan, "Ka tlawm chu pawi ka ti takzet a, khawvela a ṭha ber pawl ka hmachhawn tih ka inhre reng a ni.

"Ka ti ṭha thawkhat viauin ka hria a, theihtawpin ka indang a, a tawpah erawh min nang ching ta a ni," a ti a, vawi 25 fight a hmachhawnah vawi 20 a chak a, vawi nga a tlawm - heavyweight-a fighter ropui ber pawlah ngaih a ni reng tawh ang.

Miocic chuan, "Ka duhtawk ka hmu ta e. Ka chawl tawh dawn a ni - Pathian hnenah lawmthu ka sawi e," a ti a, vawi hnih heavyweight title a hlawh chhuak a, vawi li 'defense' in, heavyweight chanchina title humhim ngun ber record a chelh.