GIG Motors All Mizoram Inter Village: Vawiinah veng langsar an inlan nual dawn

Mizoram football-a inelna ngaihhlut leh ngaihven hlawh, khua leh veng inelna, GIG Motors All Mizoram Inter Village Football Championship chu Zirtawpni leh Inrinni an chawlh hnuah vawiin hian khelh chhunzawm a ni dawn.

Ni danga match ruk awm ṭhin chu vawiin aṭangin match kua a awm tawh dawn a, 1st Bn MAP Ground, Armed Veng leh Chite Veng Playground chauha inkhel awm ṭhin chu RG Stadium, Mualpuiah khelh tel a ni tawh dawn bawk.

Vawiinah inkhel hmuhnawm en tur a awm nual dawn - Mizoram football-a hming langsar Chhinga Veng chu RG Stadium-ah vawi chawhma dar 10:00 hian an inlan dawn a, an hmachhawn tur hi inkhelh thiam veng Durtlang Leitan an nih dawn avangin a awlsam lo ang.

1st Bn MAP Ground, Armed Veng lamah pawh veng langsar Chanmari an inlan dawn a, chawhma dar 10:00-ah Samtlang an hmachhawn ang. Chawhnu dar 2:00-a Luangmual leh Bethlehem intawng nghal tur pawh hi en châkawm tak a ni.

Chite Veng lamah Durtlang an feh chhuak dawn a, chhun dar 12:00-ah Tanhril an hmachhawn dawn. Tualchhung football-a sulhnu hraw tak tak lo hnutchhiah tawh ṭhintu Durtlangin chak an beisei ang - chawhnu dar 2:00-a Venghlui leh Thenzawl Jt. VC inhmachhawn tur pawh a en tlak viau a rinawm.