Mike Tyson-a'n Jake Paul a ngam lo
Boxing ngaina a, Mike Tyson lo âtchilh ṭhintute tan chuan Inrinni zing kha ni duhawm a ni mawlh lo - an boxer ngainat leh ngaihsan chu YouTuber aṭanga boxer-a inlet Jake Paul chuan a hneh a, 'Khawvela pa kawlhrawng ber' an tih ṭhin kha ṭhangthar tha za zawk hmaah a tlawm.
AT&T Stadium, Texas-ah fans 70,000 zetin inhnek hi a hmunah an en a, live-a en theihna Netflix-ah mi maktaduai 60 chuangin an en bawk - mahse, an beisei inhnek hmuhnawm an hmu lo a, tlangval tha za, boxing tui ve em em leh boxing legend, kum upa tawh tak inhnek pakhat a ni ve mai e!
Fans tam takin boxer pahnih hi an au el a, an thil hmuhah an lawm lo - inhnek hmuhnawm an beisei a, an beisei an hmuh loh avangin fans tam tak chu result puan a nih hma hauhin an haw. Paul hi unanimous decision-in, judge pathumin 80-72, 79-73 & 79-73 a chak zawkah an puang a ni.
An inthlau
Boxer pahnih hi an vanglaia intawng ni ngat se, Jake Paul-a'n round khat pawh a daih kher lo ang - mahse, Tyson hi kum 58 a ni tawh a, Inrinni zing inhneka langsar zawk leh thiam zawk chu kum 27 mi boxer hi a ni.
Tyson-a kum a tam tawh avangin fans tam takin chak tur chuan Jake Paul a knockout hma a ngaih tur thu an sawi a, mahse, round riat ngawt an khelh tlin avangin Tyson hi a chau takzet tih a lang a, a kum zat ngaihtuahin thil awm tak pawh a ni tho.
Round riat an inhnek chhungin Tyson hian vawi 18 chiah Jake Paul hi a hnek fuh ve a, YouTuber-Boxer hian vawi 78 zet a hnek fuh thung - a tawpah chuan a phu ang ngeiin Jake Paul a chak a, an inhnek zawhah Tyson hi zahna lantir nan chibai a buk zui.
Sum tamna
Boxer pahnihin mipui beisei inhnek hmuhnawm an chhawp chhuak thei lo a, an sum hlawhchhuah erawh a tam hle - a hmuna inhnek enna, ticket hralh man aṭang ringawta sum hmuh zat hi pound maktaduai 14.1 ngawt a tling.
Ticket zinga a man to ber chu 'VIP Seat' a ni a, he ticket man hi £1.6mtd a ni hem mai! He ticket changte hi chuan ring hnaih takah seat an chang a, boxer inlan pahnihte thla an lakpui thei bawk.
Social media kaltlanga invawrh lar a, tun dinhmun thleng ta Paul hian he inhnek aṭang ringawt hian £30mtd a hlawh nia sawi a ni a, a hneh tak Tyson pawhin £15mtd lai a hlawh phak - kum 58 boxer hlawh atan chuan ṭha tak a ni.
Hmabak chu
Jake Paul-a'n vawi 12 fight a hmachhawnah a vawi 11 nan hnehna a chang a, a hneh loh awmchhun hi nikuma a ngam loh tak Tommy Fury kha a ni - Mike Tyson a hneh a, tunah chuan boxer rothap ber pawl Saul 'Canelo' Alvarez a cho leh tawh!
Paul chuan, "Sum tam tak hlawhchhuah a duh a, sum awmna chu a hria e," a ti - hetihlai hian Paul hian McGregor chu MMA-a fight neihpuiah a cho bawk a, a thleng lo ang tih a sawi theih loh.
Vawi 59 inhneka a vawi sarih nana tlawm Tyson pawh a awm mai mai bik lo - Jake Paul nen an inhnek zawh hian a unaupa Logan Paul a cho ve zui a, Jake Paul nen an inhneka a chet dan ngaihtuah chuan, mipuiin a chungah beiseina an nei sang lutuk tawh lo ang!