Group hmahruaitu nih inchuh Porto mualah Man City

Zanin dar 1:30 hian Manchetser City chu FC Porto mualah an lenglut dawn. Champions League group C aṭangin team pahnih hian last 16 an lut chiang tawh a, hmahruaitu zawk nih inchuhna a ni ang.

Pep Guardiola naute hian point 12 neiin hma an hruai mek, an inhnehtawk a nih pawhin a chung berah an awm tlang ang. Portuguese club tan erawh hmahruaitu ni tur chuan City hneh ngei a ngai dawn.

Man City hian kar tawp Premier League inkhelah Burnley 5-0 in an sawp, inbuatsaihna an nei ṭha hle. Guardiola enkawl City hi zaninah pawh chak tura rinkai an ni ang, group hmahruaitu nih hi last 16-a team khauh zawk pumpelh theihna a nih avangin a pawimawh.

Hliam dam hlim Nathan Ake tan inlan theihna hun a nih a rinawm, defender pawimawh Aymeric Laporte leh striker Sergio Aguero te erawh an dinhmun a chiang lo thung. Spanish manager Pep-a'n, "Aguero chungchangah kan hmanhmawh lo ang," tiin a lo sawi tawh. Argentine striker hi tun hnaiah hliam vangin a buai ngun a, 100% a dam chiang lo chung chuan a chhawr dawn lo.

Porto hian Primeira Liga laman beisei an phak lo, match riat an khelh chinah pathumna an ni mek. Champions League lamah erawh vawi li an khelh aṭangin ṭum thum an chak thei, an hneh loh awmchhun hi zanin an hmachhawn tur Man City hi an ni. Etihad Stadium a an intawn ṭumin Man City hian 3-1 in hnehna an chang, an intawn hmasak hian Aguero, Ilkay Gundogan leh Ferran Torres ten goal an khung.