Netherlands-in Hungary an ngam

UEFA Nations League quarterfinal lut turin Netherlands tan harsatna a awm lo - Inrinni zan khan an mikhual Hungary chu 4-0 ngawtin an sawp a, Germany hnung zuiin quarterfinal an lut chiang.

Netherlands hian first half-ah goal hnih khungin, penalty aṭanga lut ve ve a ni a, hei hian an tan inkhel a tiawlsam sawt. Dutch team tan hian Wout Weghorst leh Cody Gakpo ten penalty an khung ve ve a, 2-0 a hmahruai chungin chawlhlawk an hmang.

Second half-ah Netherlands tan Denzel Dumfries leh bench aṭanga luhtir Teun Koopmeiners ten goal khat ve ve an khung ve leh a, Hungary tan an mikhualna rama tho leh turin hun a awm tawh lo.

He inkhelah hian minute sarihnaah thil duhawm lo tak thleng a awm a, Hungary assistant coach Adam Szalai chu a tlu. Khelmualah enkawl nghal a ni a, spanish referee Jesus Gil Manzano chuan inkhel hi minute 10 lai a chawlh lailawk tir hial.

Hungarian Football Association chuan thuchhuah siam nghalin, "Adam Szalai hian inkhel ṭantir lam khan hrehawm a ti tawh a, mahse, tun dinhmunah chuan a ṭhain, amah pawh biak theih a ni e," an ti a, Amsterdam damdawi inah tlanpui a nih thu an sawi bawk.

Kum 36 mi Szalai hian kum 2023 khan inkhelh chawlhsanin, coaching lamah a lut zui. Ram tan match 86 a khel a, goal 26 a khung hman. Germany lamah a hun tam zawk hmangin Mainz 05, Schalke 04, Hoffenheim, Hannover 96 leh Swiss club FC Basel tan a khel hman.