Fritz hneh loin Zverev a tla

Alexander Zverev-a'n a vawi thum nan ATP Finals nomawi chawi a tum a, mahse a kalkawngah Taylor Fritz a lo awm - German tlangval hian Fritz a paltlang thei lo a, semifinal-ah a zinkawng a tawp.

Inrinni zan khan Italy, Turin-ah semifinal khelh niin seeded pangana Fritz hian seeded pahnihna Zverev hi 6-3, 3-6, 7-6 (3) in a hneh a, nizan khan Jannik Sinner nen nomawi an inchuh zui a, result erawh kan hre hman ta lo.

ATP Finals vawi hnih champion tawh Zverev chuan, "Ṭha taka khel chunga chak lo zawk nih hi chu a hrehawm a, min nghawng na ṭhin bawk - a bik takin set thumna kan khelh lai khan chak turin remchang ka nei ṭha em em a, ka chhawr thei tlat si lo.

"Match ṭhenkhatah chuan a khel ṭha lo zawk ni chunga chak loh chang a awm, chutiangah chuan mahni inpawm mai pawh a awlsam, tunah erawh ṭha taka khel chung siin a chak lo zawkah ka ṭang," tiin a sawi.

Semifinal inkhel dangah Sinner chuan Casper Ruud lakah harsatna a tawk lo, world number 1 leh seeded pakhatna ni bawk Sinner hian a khingpui hi 6-1, 6-2 in a hneh a, tun season chu ani aia khel ṭha sawi tur an awm lo.