Pogba leh Juve an inṭhaṭhen

Paul Pogba leh a club Juventus chuan inremsiamnain an contract neih lai chu November 30-a tawp turin an ti a, a hnu lamah chuan Pogba hian club a nei dawn tawh lo - nakkum January bazarah chuan man nei loin a duh zawng club a zawm thei dawn a ni.

Kum 31 mi Pogba hi damdawi hman phal loh a hmang tih hmuhchhuah a ni a, hei vang hian nikum September thla aṭang khan an hrem ṭan a, kumin February thla khan kum li chhung atan hrem a ni tih puan a ni bawk.

Mahse, Pogba hi infiamna lama thubuai ngaihtuahtu sang ber Court of Arbitration for Sport (CAS) hnenah a zualko a, hrem a nihna hi kum li atan tih chu thla 18 atan chauh an pawh tawisak a ni.

Hrem a nihna hi nikum September aṭang khan chhiar ṭan a ni a, thla 18 a nih takah chuan nakkum January aṭangin training a zawm thei ang a, March thlaah a inkhel thei tawh ang.

France midfielder hian hmanni khan Juventus lo chu club dang ngaihtuah a neih loh thu a lo sawi lawk tawh a, Old Lady tan hian a khel zawm zel tura ngaihna pawh a lian hman, mahse tunah chuan club dang a zawm a ngai dawn ta zawk a ni.

Juventus chuan thuchhuah siamin, "Juventus Football Club leh Paul Pogba te chuan inremsiamna in, contract awm lai hi kumin November 30-a tawp turin thu kan titlu. Paul hi a hma hun lo awm leh zel tur atan duhsakna kan hlan," an ti.

Pogba chuan, "Hun harsa ka tawh lai khan Bianconeri hian min thlahthlam lo a, a bik takin tun hnai kum hnih chhung chu ka chungah ṭhat an chhuah nasa hle. Old Lady tana hun ka hman zawng zawngte kha ka ngaihlu a, ka hre reng tawh ang.

"Tunah chuan hma lam ka pan a ngai dawn, ka club thar tur tan a ṭha thei anga bera khelh ka tum dawn a, chumi tur chuan ka lo inbuatsaih dawn a ni," tiin a sawi a, hrem a nih hma pawhin hliam vangin match a khel tlem a, a tan thawh chhuah leh thut a harsa mai thei.

Kum 2022-23 season khan khelmual chhungah minute 165 chauh hun a hmang, season hmasa khan minute 51 chauh a inkhel. Juve tana a contract neih lai, tuna an tihtawp tak hi kum 2026 June thla thleng daih a ni a, kum khatah pound maktaduai 6.9 a hlawh a ni.