Remsiami telna India chak zel

Women’s Asian Champions Trophy 2024 khelh laiah India chuan Inrinni zan khan China chu 3-0 in an hneh a, group match vawi li an khelh tawh chinah hnehna an la chang fai vek.

India tan Sangita Kumari, Salima Tete leh Deepika te chuan goal khat ṭheuh an khung - team ṭha ni mah se China lamin a chhanletna tur an nei lo, India team tlarhnung a phui ṭha hle.

Lalremsiami Hmar chu India tan a inlan leh a, ram tan match 151 a khel tling ta - China lakah Remsiami hian goal khung lo mah se player pawimawh zinga mi a ni, goal khung aiin a semtu atan hman a ni.

Tun inelna neih laiah China hi ranking sang ber an ni a, world number 6 niin India hi number 9 an ni thung. India hian nizan khan an group match hnuhnung ber atan Japan an hmachhawn a, result kan hre hman lo.

Women’s Asian Champions Trophy 2024-ah hian team paruk an inlan, vawi khat ṭheuh an inkhel kual ang a, chumi hnuah a sang paliten semifinal an khel ang. Match vawi li an khelh aṭangin India leh China chuan semifinal lut chiang tawh a ni.