Germany-in goal sarih an khung

UEFA Nations League-ah Germany chuan 7-0 ngawtin Bosnia-Herzegovina an sawp a, he inelnaa match khata goal sarih khung thei hmasa ber an ni - an nep lo hle.

Inrinni zan inkhelah Germany tan Bayern Munich-a season duhawm tak hmangtu Jamal Musiala chuan international football-ah pawh a season duhawm hman a chhunzawm zel a, minute hnihna lekah goal hmahruai a khung.

Musiala hnuah hian Tim Kleindienst leh Florian Wirtz ten goal hnih ve ve an khung a, Kai Havertz leh Leroy Sane ten goal khat ve ve an thawh bawk - mikhual team-in a chhanletna tur an nei lo a, nuamsa takin Germany an chak.

Die Mannschaft hming lem an pek Germany hian Bosnia-Herzegovina an sawp hma hian quarterfinal an lut chiang tawh a, hnehna an chan leh tak avangin, match khat khelh tur la nei mah se, group hmahruaitu an ni chiang bawk.

League A3-ah Germany hi awmin, group hmahruaitu nih hi quarterfinal-a seeded nihna a ni a, a hlu hle - March thlaa quarterfinal khelh hunah group-a pahnihna ni chunga a thiam pariat zinga inhlangkai team an hmachhawn ang.