World Cup qualifying: Colombia hnehtu Bielsa-a 'Uruguay'

Sawiselna tam tak karah Marcelo Bielsa a ding nghet tlat a, a thil tumah a chiang hle bawk - Bielsa enkawl Uruguay chuan attacking game hmuhnawm lantir chungin Colombia chu 3-2 in an hneh.

Bielsa hian team thar din a tum a, chumi kawngah chuan a senior player ṭhenkhat chu a paih - sawiseltu an tam a, a team rem leh thlan dan sawiseltu zingah Luis Suarez pawah a tel.

Mahse, Bielsa hian World Cup 2026 atan team nghet tak din a tum a, a thil tum hi Uruguay Football Association lamin an thlawp bawk, tunah chuan kawng dik a zawh mek ni pawhin a lang.

World champion hmasa ber hian mikhual an thlen hoah beisei an phak lohna a rei tawh, nikum July thla hnu khan chak ni hmel an la hmu lo, match an khel tam lo bawk.

Inrinni zing khan Centenario-ah mipui 40,000 chuang an pungkhawm a, goal erawh an neih har bakah an chhuah hmasa bawk. Mikhual Colombia lamin Juan Fernando Quintero-a goal hmangin chawlhlawk laiin hma an hruai.

Second half-ah Colombia defender Davinson Sanchez chuan anmahni lamah a tilut a, mualneitu lam phurna tizual turin Rodrigo Aguirre chuan goal a khung belh bawk.

Inkhel boruak san vanglai erawh hun tawp dawnah a ni. Minute 90+6-ah Colombia lamin Andres Gomez hmangin si phurh an sut zo a, anmahni mualah Uruguay an chak zo lo leh dawn emaw tih hnuah, hun tawp hma chiahin Manchester United midfielder Manuel Ugarte chuan chakna goal a khung.

Uruguay coach Bielsa chuan, "Inkhel harsa tak chu a ni a, a tawpah khan chak duha tuihal zawk kan nihna chu a takin a lang. Ka naute hian an nihna tak an pholang a nih chuan team ṭha hneh turin theihna kan nei tih a takin a lang chiang hle bawk," a ti a, a team din chuan hmalam an pan tih a sawi bawk.

World champion hmasa ber hian World Cup qualifier match 11 aṭangin point 19 an hmu a, pahnihna dinhmun an luah mek - point hmuh zat inangah Colombia aiin goal difference an nei ṭha zawk a ni.

Colombia coach Nestor Lorenzo chuan, "Uruguay khan player an nei ṭha em em a, hmun tinah an hlauhawm emawni tih mai tur a ni a, inven tum viau mah ila kan inveng seng lo," tiin an khingpui team a fak.

An match lehpekah chuan Colombia hian Ecuador an tum dawn a, Uruguay chu world champion vawi nga ni tawh Brazil ramah an feh chhuak thung ang. Bielsa naute hi an ṭha tak tak em, tih chu fiah a ni ang.

South America ram 10 te hi vawi hnih ṭheuh an inkhel kual chhuak vek dawn a, chumi hnuah a sang zual paruk chu World Cup 2026 khel turin an tling nghal ang, pasarihna pawhin playoff an la khel thei dawn a ni - South America aṭangin World Cup ticket nei pasarih an awm thei tihna a ni.