Inkhel hmuhnawmah Celtics an chak

Nimin zing NBA regular season inkhelah Boston Celtics leh Toronto Raptors an inkhel tawk hle a, over time an khelh zawh hnuah Boston hian 126-123 in hnehna an chang.

TD Garden-a inkhelah Celtics tana point nei tam ber chu Jaylen Brown (27) a ni a, ani bakah hian Jayson Tatum (24), AI Horford (18), Derrick White (18) leh Sam Hauser (14) te an che ṭha a, an chak theihna hnar an ni.

Raptors tan Jakob Poelrl chuan point 35 neiin, team pahnih zingah pawh a nei tam ber, ani bakah hian player dang pali pawhin point 10 an nei tling thei, mahse a tawpah a vanduai zawkah an ṭang.

Hun tawp dawna basket pawimawh neitu Jayson Tatum chuan, "Tihsual ka nei tam hle a, a bik takin second half-ah khan shot fuh loh ka ngah, inrintawka neih sang pawh kha a harsa hle.

"Mahse, hun tawp dawnah khan ka koah mawhphurhna a tla ta si a, ka shot dawn chiah kha chuan ka hlauthawng tawh lo. Team ṭha tak lakah a vannei zawk kan ni, mimala langsar tak an kawl lo a ni mai thei, mahse team ṭha an ni," a ti.

Boston Celtics hian NBA regular season kal laiah vawi 11 hnehna an chang tawh, ṭum thum an tlawm tawh thung; Eastern Conference table-ah chuan pahnina an ni mek a, chak lo Raptors erawh vawi hnih chauh an la chak avangin a hniam ber an ni thung.