Nadal hun hnuhnung a pawimawh - Alcaraz

Davis Cup Finals 2024 khelh hun a hnai, mipa tennis team hmanga inelna hi Nilaini aṭangin an khel ṭan dawn - Rafael Nadal tan a tournament hnuhnung ber a ni dawn.

Carlos Alcaraz chuan a naupan lai aṭanga a ngaihsan, a entawn ni bawk Nadal hun hnuhnung a tel thei tur chu lawmawm a tih thu a sawi. Nadal leh Alcaraz te hi an ram Spain tan an feh chhuak dawn a ni.

Kum 21 mi Alcaraz chuan, "Tennis ka khelh tawh chinah chuan ka tana tournament pawimawh ber a ni dawn. Spain tan kan inlan dawn a ni a, chumi mai bakah chuan Rafa hun tawpna a ni dawn bawk.

"Davis Cup champion nih hi tun hma aṭanga ka duhthusam a ni ṭhin bawk a, chumi hlen chhuak tur chuan mi ropui tak Rafa nen kan bei dun dawn a ni, a phurawm rualin a lunglenthlak tel bawk a ni," a ti.

Spain hian tun hmain Davis Cup title an lo la fo tawh, mahse Alcaraz inlan ve chinah erawh an la champion rih lo. Kumin chu Nadal thlahna tur a nih bawk avangin season dang nen a boruak a inang dawn lo.

Nadal chuan Davis Cup hi inelna a hmachhawn hnuhnung ber tur a ni tih a sawi chiang tawh a, Grand Slam vawi 22 champion tawh hi tennis season thar aṭang chuan stadium-ah a lut a nih pawhin a entu zingah a tel tawh dawn a ni.

Hliam vangin a buai fo a, tunah chuan duhthusam angin a khel thei ang em, tih chu zawhna a ni a, a taksa a inpeih famkim lo a nih chuan singles match khel loin, doubles huangah chauh a inlan tur thu pawh a lo sawi tawh a ni.