Mellung phuntu LeBron James

LeBron James chuan a match hnuhnung paliah triple double a nei vek - Basketball legend hian tun hmain hetiang thil hi a la tithei ngai lo, a tawn vawi khatna a ni.

Inrinni zing NBA Cup inkhelah kum 39 mi James hian point 15 a nei a, hei bakah hian rebound vawi 15 lain assist ṭum 12 a nei bawk - a team Lakers hi San Antonio Spurs lakah 120-115 in a chakpui.

James hian basketball inelna sang berah hian season 22 chhung hun a hmang tawh, sulhnu ropui leh ṭha tak tak pawh a hnutchhiah hnem tawh hle. Mahse, a zawna match li chhung triple double neih tak hi chu a vawi khatna a ni ve thung.

Lakers thiampuipa James chuan, "Ka tan chuan thil lawmawm a ni a, chutihrualin a pawimawh zawk chu basket ka neih bakah keimahni lam basket venghim tura tha ka thawh ve ṭhin kha a ni.

"Midang tana ṭangkai nih hi ka duh ṭhin a, chutiang bawkin ka tana ṭangkai turin midang pawh ka beisei ṭhin, a chhan chu basketball chu team game a nih vang a ni, chutiang tak chuan tun ṭumah khan kan khel," a ti.

Russell Westbrook (2021) leh Magic Johnson (1987) te chuan a zawnin match li chu triple double an lo nei tawh a, an sulhnu ropui ang hi James chuan a rawn nei ve ta a, khum tumin a hmabakah theihtawp a chhuah ngei ang.