Buaina karah Hamilton a chak

Lewis Hamilton chuan tun season Formula 1 intlansiak bika a vawi 11 nan hnehna a chang a, tun season atan team leh driver champion a chian tawh avangin result hian ngaihven a hlawh tawk lo.

Mahse, Bahrain Grand Prix-ah hian chetsualna lian tak a thleng a, Haas driver Romain Grosjean chu kawng sirah tlan chhuakin kangmei a chhuak, hliam na tak erawh a nei lo hlauh thung.

Intlansiak tir lamah Grosjean leh Daniil Kvyat nen an in tai palh, Haas driver hi kawng sirah tlan chhuakin bang a su zui. A car a kang a, harsa takin a car a chhuahsan hnuah kangmei hi ṭhelh a ni.

Chetsualna a thlen avangin inelna chawlh lailawk a ngai hial. Hliam na tak nei lo mah se ambulance hmangin an la hrang a, damdawi inah enkawlna ṭha pek nghal a ni bawk.

F1 huang chhungah hian chetsualna hrang hrang a lo thleng tawh ṭhin, 1991 khan Monaco tlan kawngah car a bung hmawk tawh - car a bun hnuhnung ber a ni hial. 1989 hnua tun ṭum ni vawi khata car a kan (fire) chhiat ngal vek lehna hmasa a ni hial.

Haas chuan an driver chungchangah thu chhuah siamin, "Thil engkim a ṭha zawnga a kal chhunzawm kan beisei, Grosjean pawh dam leh thuai turin duhsakna kan hlan," tiin an sawi.

Grosjean chetsualna vanga an chawlh hnuah inelna neih chhunzawm a ni a, Lance Stroll leh Kvyat ten harsatna tawk lehin buaina lian tham a chhuak zui lo. Driver ṭhenkhat chuan rilru chiai leh baihvai takin inelna an hmachhawn zui tih a lang.

A hmasa ber (pole position) aṭanga tlan ṭhan Hamilton erawh a chesual duh lo, nghet takin hma a hruai tlang thei a ni. Mercedes driver hnungah hian a teammate Valtteri Bottas leh Red Bull car khalhtu Max Verstappen te an thleng zui ve bawk.

Hnehna changtu Hamilton chuan, "Chetsualna a thlen hnua intlansiak chhunzawn hi chu rilru a khingbai ṭhin. A pawn aṭanga entu tan chuan nuamsa taka hnehna chang ka ang mai thei, tlan kawngah erawh a ni ve lo. Ka chak theih nan ka theihna zawng zawng ka hlan," a ti.