Coppa Italia champion Juventus
Juventus-in treble champion ni turin Champions League champion chiah an mamawh tawh. Italian champion hian Nilaini zan khan extra time-a Alessandro Matri goal hmangin Lazio 2-1 in an hneh a, Copa Italia-ah an champion.
Juventus-in final-ah hrem vangin Claudio Marchisio leh Alvaro Morata an chhawr thei lo a, Lazio-in inhliam vangin Lucas Biglia an hmang thei bik lo.
Mak ang reng takin final-ah team pahnihin tlar hnungah player pathum ve ve an hmang a. Minute lina lekah freekick aṭanga ball kal chu Juve midfielder Andrea Pirlo zuan san tawk loh vangin Stefan Radu-a'n a tauh lut.
Minute 11-naah freekick hmang bawkin a goal a, Pirlo-a'n a pet ve thung tawh. Italian midfielder ball pet thiam freekick pet chu Paul Pogba-a'n a khawih per hnuah Giorgio Chiellini-a'n a volley goal a, 1-1 a ni.
Team pahnihin goal chance an inneih chhawk a, hun tawp hma hretin Lazio substitute Filip Djordjevic-a'n goal a khung teuh takzet a. Juventus pawhin chance an nei ve tho a, Pirlo pass Matri khung chu offiside vangin pawm a ni lo.
Extra time-ah Carlos Tevez ball pet chu Lazio defender-in dan sak mah se a per chu Matri-a'n kawh zetin a pet a, keeper Etrit Berisha tan dan rual a ni lo.
Goal dang a lut tawh lo a, kum 1995 hnua a vawi khatna atan Juventus an champion.
Treble champion?
Kum 2010 khan Jose Mourinho kaihhruai Inter Milan-in Serie A, Copa Italia leh UEFA Champions League nomawi chawiin treble champion an ni a, Juventus-in Inter hnung zui turin Barcelona hneh chiah an mamawh tawh.
Juventus hi kum li chhung a zawnin Serie A-ah an champion ta a, June 6 khian Berlin-ah Barcelona an hmachhawn dawn.
La Liga champion Barcelona hian UCL final bakah Copa del Rey final khelh tur an la nei a, treble champion thei an ni.
Allegri thukhawchang
Juve boss Massimiliano Allegri chuan, "Lazio khan game ropui tak an khel a, final hmuhnawm tak a ni ngei ang. Serie A nen a danglam dawn tih kan hria a, goal ban vawi hnih an tih per kha an vanduai a ni. Chutihrualin keini pawhin chance ṭha kan hlah ve tho a, champion chu kan phuin ka hria," tiin inkhel chungchang a sawi.
Allegri chuan sawi chhunzawmin, "Scudetto (Serie A title sawina) leh Coppa Italia champion hi a harsa a, tuna kan hmabak chu Champions League a ni," tiin treble champion ngei an tum thu a sawi.