Suarez laka rilru chhia pu lo Chiellini

World Cup group stage-a Italy leh Uruguay an intawn ṭumin Uruguay forward Luis Suarez-a'n Italy defender Giorgio Chiellini a seh a, FIFA-in Suarez hi hremin thla li chhung football kaihhnawih hrim hrima inhman an phal lo.

Player pahnih hi UEFA Champions Lea­gue final June 6 a khelh a nih hunah Berlin khawpuiah an intawng leh dawn. Suarez hi Barcelona player pawimawh a nih laiin Chiellini pawh hi Juventus tlarhnung ti rinawmtu a ni.

Kum 30-a upa Italian defender Chiellini chuan an boruak hlui avanga Suarez a huat loh thu sawiin, "Suarez huatna ka nei hran lo. Player inhmachhawn tur kan nih angin pangngai takin ka hmachhawn anga, Karim Benzema, Lionel Messi, Neymar leh Gareth Bale te dan beh ka tum dan ang tho in dan beh ka tum ang," tiin a hranpa taka Suarez huatna a neih loh thu a sawi.