Liverpool leh Sterling boruak: Engtinnge ni zel dawn?

April thla khan Liverpool-in an rawlthar duhawm Raheem Sterling contract thar ziahpui an tum a, kar khata £35,000 hlawh mektu winger hian kar khata £100,000 hlawh tura Liverpool-in an thlemna chu a hnar.

May 10-a Chelsea leh Liverpool an inhnehtawk ṭum khan Sterling hian inkhelh hma in Liverpool manager Brendan Rodgers hnenah season thara chhuah a duh thu a hrilh niin an sawi a, Zirtawpnia Reds manager Brendan Rodgers leh chief executive Ian Ayre a hmuh hunah chhuah a dil dawn nia sawi a ni bawk.

Kum 2017-a a contract neihlai hmang zo tur Sterling hian Thawhlehni khan Liverpool Young Player of the Year lawmman a dawng a, fans ṭhenkhatin tunhnai boruak vangin an au el a, a ṭhenin 'Stay Raheem' tiin Anfield-a cham chhunzawm zel turin an lo sawm ve bawk.

Sterling-a chhuah duh chhan

Kum 20 leka upa winger hian Liverpool in sum tam tham tak nena contract thar an zawrh tirh khan, "Ka tana pawimawh ber chu sum nilovin trophy a ni," alo ti tawh a, trophy a chawi theihna tur club-a kal a duh thu a lo sawi tawh.

English winger hian football level sang thei ang ber khelh a duh thu a lo sawi tawh a, world class player ho bula nitin training neih a duh thu a lo sawi tawh bawk. Season tharah Liverpool-in Champions League an khel dawn lo a, tunhnaia an world class player pahnih Luis Suarez leh Steven Gerrad te chhuah dawn vangin Liverpool a cham reng hi a duh lo niin a lang.

April-a BBC nen an interview ṭumin England international hian, "World Class player te nena nitin thawh ho hi ka thil chak ber a ni. Tunhnaia Luis Suarez chhuah vang leh Steven Gerrard chhuah dawn vangin Liverpool hian player ṭha kan mamawh a, chutiang mi chu an lo lut turah ka ngai a ni," tiin player pawimawh pahnihin Liverpool an chhuahsan pawi a tih thu a lo sawi tawh.

Sterling-a tel lohna

Liverpool engtin nge?

Zawhna lian tak pakhat chu Sterling hian Liverpool chhuahsan ta se Liverpool-in an tuar ang em? tih hi a ni. Season hmasa lawkah Liverpool-in Premier League nomawi an khawih thuak hman a, an kuta awm tawh nomawi thlauhin pahnihna an ni. Liverpool chet ṭhat nana thawhhlawk ber chu goal 31 khungtu Luis Suarez a ni.

Tun season-ah Luis Suarez-a'n Barcelona a pan a, Liverpool-in a thlakna tur an hmu zo lo. Season hmasa a Suarez nen inkawp fuh em em Daniel Sturridge a inhliam reng bawk nen Liverpool-in goal khung thei an tlachham a, season thara Champions League an khelh loh chhan tur lian tak a tling.

Season tharah Steven Gerrard tel loin Liverpool an khel dawn bawk a, Stevie-a'n Liverpool tana a lo tih tawh zawng zawng ngaihtuah chuan Captain Fantastic thlak zo tur hmuh hi thil theih loh tluk a ni.

Raheem Sterling erawh kum 20 chauha upa a ni a, a seaon hman ṭhat ber ṭum tun season-ah Liverpool tan goal 11 a khung hram a, chhuak pawh nise Liverpool hian an tuar lutukin a rinawm loh.

Kum naupang te nichunga England tana khel pha winger hi player ṭha a ni tih hi phat rual a ni lo. Mhase, Luis Suarez leh Steven Gerrard thlaktu tur zawn ai chuan Sterling thlak zo tur player zawn hi thil harsa a ni hran lo ang.

Liverpool fan-te'n

engtinnge an ngaih ang?

Liverpool Award semnaah fan ṭhenkhatin Sterling an auh el laiin a ṭhenin cham rih turin an ngen thung. Tunhnaia Sterling chet dan ngaihtuah chuan fan tamzawkin a chhuah hi pawi an ti lo anga, a cham a nih pawhin an sawisel hran lo ang. Mahse, fan-te rilru hliam tawh thawidam tur chuan tun season aia ṭha hian a khelh a ngai ngei ang.

Manager phalna la lovin BBC interview a lo neihpui a, ualau takin Liverpool chhuahsan a duhthu a tilang bawk. Heti chung hian Reds manager Brendan Rodgers chuan naupang mai anih vangin Sterling chuan a tisual palha a ngaih thu a sawi a, heti taka manager thlawpna ṭha hmu chunga chhuah a duh tlat hi Liverpool fan te'n an ngaithiam thei lo. Pound maktaduai 35 a lei duh an awm ngat phei chuan Liverpool fan tamtak chu an lawm zawk maithei.

Khawiah nge Sterling a kal ang?

Sterling-a'n Liverpool chhuahsan a duhthu thuthang a awm aṭang khan Europe-a club lian tak tak hming a ri nghal a; club langsar zingah Barcelona, Bayern Munich, Real Madrid, Chelsea, Manchester City leh Arsenal te hming lamrik a ni.

La Liga champion hlim Barcelona hian Lionel Messi, Suarez leh Neymar te an kawl a, pound maktaduai 35 chuang man Sterling hi an mamawhin a lang lo. Lak an tum anih pawhin heti zat insen hi an inhuam kher lo ang.

Real Madrid coaching staff zinga mi Zinedine Zidane chuan Sterling an enthlak thu a lo sawi tawh a, mahse La Liga leh Champions League-a an beisei ang result hlawhchhuak zo lo team hian season tharah in lak ṭhat an tum tak tak a nih chuan Sterling aia hming lian leh tawnhriat ngah tawh zawk player an melhin a rinawm.

Sterling duhtu zinga an sawi Bayern Munich hian Allianz Arena-ah English rawlthar hi lalut pawh nise regular player a ni phakin a rinawm loh a, regular player lo tur tana pound maktaduai 35 chuang insen hi an huam lo ang.

English club zinga hming ri ring pawl Chelsea-in Eden Hazard te ho an nei a, Sterling an mamawh lo. Tun dinhmuna Sterling la thei tura ngaih chu Manchester City leh Arsenal an ni.

Manchester City manager Manuel Pellegrini chuan English player la naupang leh talent nei ṭha an zawn thu a lo sawi tawh a, chutiang mi chu Raheem Sterling hi a ni. Arsenal-in Theo Walcott contract tha an zawrh mek a, English winger hian a ziak duh lo a nih chuan Raheem Sterling lam an hawiin a rinawm.

A neitute thu thu!

Liverpool neitu Fenway Sports Group hotupa John W Henry hi pa luhlul ve tak a ni a, kum 2013-a Luis Suarez-a'n chhuah a tum khan hralh tumna an neih loh thu a sawi a, a thusawiah a ding nghet. Season khat dang Liverpool-ah Suarez a cham a, fan-te rilru a lo hliam tawh pawh field chhungah a thawi dam.

Mahse, Sterling erawh Suarez anga player lian, mahni chauh pawha club khaiding thei khawpa player ṭha a ni hran lo a, manto taka lei duhtu an awm chuan John Henry hian hralh mai a pawi ti lo ang.