Arsenal draw-tu Sunderland an him

March 17 khan Sunderland chuan Premier League aṭanga tlak duh loh vangin coach atan Dick Advocaat an la lut a, Dutch manager hian Black Cats hi hmun himah a hruai thleng.

Nilaini zan khan Emirates Stadium-ah Arsenal-in tlak hlau Sunderland an mikhual a, ṭan phat aṭangin Advo­caat-a hoten an mamawh point khat hlawhchhuak turin defensive game an khel a, goal lut loin an inhnehtawk.

Sunderland forward Steven Fletcher-a'n goal khung theihna tur chance ṭha ṭum thum an hlah a, inkhel pumpui thununtu erawh Arsenal an ni. Gunners tana Olivier Giroud leh Kieran Gibbs te goal khung tur chu keeper Costel Pantilimon-a'n a dang ṭha hle.

Manchester City keeper hlui Panti­limon hi Black Cats chandamtu a ni a, inkhelh bana hming langsar ta ber erawh team remkhawmtu manager Advocaat a ni.

Sunderland hian an match hnuhnung berah champion tawh Chelsea chu Stamford Bridge-ah an khelhpui dawn a, point hlawhchhuah a harsat dawn avangin Arsenal laka point khat hmuh hi a hlu lehzual. Arsenal-in point thum an hlawhchhuah theih tak loah chuan an chunga awm Manchester City an umpha thei tawh lo a, pathumna an ni chiang tawh.

Advocaat thukhawchang

Gus Poyet khan Sunderland a enkawl match hnuhnung 12-ah vawi khat chiah a chak pui a, a ban khan Premier League-ah 17-naah an awm a, relegation zone aṭanga an himna chu point khat chiah a ni.

Advocaat-a'n Uruguayan coach sulhnu a rawn chhui a, season khelh hmabak enkawl turin contract a ziak. Tunah chuan kum 67-a upa manager hian a hmalam hun a ngaihtuah a, thutlukna a la siam lo.

Dutch manager chuan, "Kar khat hnuah thutlukna ka siam ang. Pawi intih loh chuan ka thutlukna chu midang hriat turin puanzar ka la tum lo," tiin a sawi.

Final whistle zawha mittui tla chung­chang sawiin Advocaat chuan, "Bert van Lingen nen hian kum 25 an thawk dun a, hun tawp rual chiah khan lawm vangin a mittui a tla nghal a, ka ṭah pui ve nghal," tiin an hlim zia a tarlang.

Sunderland-in an him tih an hriat rualin fans chuan "Newcastle khan kan inkhel hi in lo thlir em?" tiin an au ruala, an pawr hle.

Sunderland leh Newcastle te hi England hmarchhak club an ni a, Blackcats hi Wearside huamchhunga awm an ni a, Magpies hi Tyneside huamchhunga awm an ni. Khaw inhnaih tak an nih avangin club inhal tak an ni. Tyne-Wear derby (Newcastle khelmuala an khelhin) emaw Wear-Tyne derby (Sunderland khelmuala an khelhin) boruak pawh a sang ṭhin hle.

Tun ṭumah chuan club pahnih hi an inkhel dawn tawh lo a, Sunderland ṭantute hian la him ve lo Newcastle an deu sawh a, relegation battle ngaih­nawmna belhchhantu a ni.